काठमाडौं : हवाई सुरक्षामा गम्भीर कमजोर गरेको भन्दै नागरिक उड्ड्यन प्राधिकरणका महानिर्देशक प्रदीप अधिकारीको राजीनामा माग गरिएको छ।

उनको कार्यकालमा पटक – पटक हवाई दुर्घटना भएको भन्दै यसअघी पनि उनले राजिनामा दिनुपर्ने भन्दै संसदीय समितिमा आवाज उठेको थियो। सोही, विषयमा पुन: प्रतिनिधिसभा बैठकमा बोल्दै नेपाली कांग्रेसका सांसद उदय शमशेर राणाले प्राधिकरणका महानिर्देशक अधिकारीको राजीनामा माग गरेका हुन्।

अधिकारी प्राधिकरणको महानिर्देशक बनेपछि ७ वटा हवाई दुर्घटना भएको र त्यसमा ११८ बढी मानिसले ज्यान गुमाएको भन्दै नैतिक प्रश्न उठिसकेकाले तत्काल राजीनामा दिनुपर्ने र राजीनामा नदिए महानिर्देशक अधिकारीलाई सरकारले अनुसन्धानको दायरमा ल्याउनुपर्ने माग समेत उनले गरेका छन्। समिति बैठकमा अधिकांश सांसदहरूले समेत क्यान नेतृत्वको क्षमता र कार्यशैलीमाथि प्रश्न उठाएका थिए ।

दुर्घटनापछि बनेका आयोगका रिपोर्टहरूले पनि पाइलट,हवाई जहाज र मर्मतका नाममा दोषी देखाउने तर , प्राधिकरणलाई सँधै चोख्याउने गरेको भन्दै, हवाई दुर्घटनामा प्राधिकरणको जिम्मेवारी हुन्छ कि हुँदैन ? , हवाई दुर्घटनामा प्राधिकरणको कहिले दोष हुँदैन ? प्राधिकरणले कहिले जिम्मेवारी लिनुपर्देन? भनेर प्रश्न समेत गरेका छन्।

सन् १९६२ देखि हालसम्म नेपालमा ७२ वटा हवाई दुर्घटना भएको र त्यसमा ९३५ जनाले ज्यान गुमाएको उनको भनाइ छ। गत बुधबार मर्मतका लागि काठमाडौंबाट पोखरा जाँदै गरेको सौर्य एयरलाइन्सको जहाज त्रिभुवन अन्तर्राष्ट्रिय विमानस्थलमा दुर्घटना हुँदा १८ जनाले ज्यान गुमाएका छन्।