काठमाडौं – अविरल वर्षा, बाढी र पहिरोका कारण शुक्रबार (असोज १७) मा देशका पाँच स्थानमा राजमार्ग अवरुद्ध भएको नेपाल प्रहरीले जनाएको छ। प्रभावित जिल्लाहरूमा संखुवासभा, सिन्धुपाल्चोक र रसुवा पर्दछन्।

आज बिहान ७ बजेसम्मको विवरणअनुसार संखुवासभाको भोटखोला गाउँपालिका–४, बरुणस्थित कोसी राजमार्ग अविरल वर्षाका कारण पूर्ण रूपमा अवरुद्ध भएको छ। सोही जिल्लाको मकालु गाउँपालिका–३, एकुवामा पनि लामो समयदेखि कोसी राजमार्ग सञ्चालनमा आउन नसकेको प्राधिकरणले जनाएको छ।

रसुवाको गोसाइँकुण्ड नगरपालिका–२ मा बाढीका कारण सडक अझै खुल्न सकेको छैन। यस कारण नेपाल–चीन सीमा नाका सञ्चालनमा आउन नसकेको हो। नेपाल–चीनलाई जोड्ने पुल र पासाङल्हामु राजमार्ग पूर्ण रूपमा अवरुद्ध छन्।

त्यस्तै, सिन्धुपाल्चोकको भोटेकोसी गाउँपालिका–४, चारकिलोमा गएको पहिरोका कारण अरनिको राजमार्गसमेत पूर्ण रूपमा अवरुद्ध भएको छ।