काठमाडौं – नेपालले पहिलो पटक वेस्ट इन्डिजलाई टी–२० अन्तर्राष्ट्रिय खेलमा १९ रनले पराजित गर्दै ऐतिहासिक सफलता हात पारेको छ।

नेपालले दिएको १४९ रनको लक्ष्य पछ्याउँदै वेस्ट इन्डिजले २० ओभरमा ९ विकेट गुमाएर १२९ रन मात्र बनाउन सक्यो।यसअघि टस हारेर पहिले ब्याटिङ गरेको नेपालले २० ओभरमा ८ विकेट गुमाएर १४८ रन बनाएको थियो।

यसअघि नेपालले भारत, अफगानिस्तान, बंगलादेशजस्ता टेस्ट मान्यता प्राप्त टोलीसँग प्रतिस्पर्धा गरे पनि जित निकाल्न सकेको थिएन। वेस्ट इन्डिजविरुद्धको यो विजयले नेपाली क्रिकेटलाई ऐतिहासिक उपलब्धि दिलाएको छ।सिरिजको दोस्रो खेल सोमबार र तेस्रो तथा अन्तिम खेल मंगलबार हुनेछ।