काठमाडौं – नेपाल क्रिकेट संघ (क्यान) ले ओमानमा आयोजना हुने आइसिसी पुरुष टी–२० विश्वकप एसिया क्षेत्रीय छनोट प्रतियोगितामा सहभागी हुने नेपाली टिम घोषणा गरेको छ।

शुक्रबार सार्वजनिक गरिएको १५ सदस्यीय टोलीको नेतृत्व रोहितकुमार पौडेलले गर्नेछन् भने उपकप्तानको जिम्मेवारी दिपेन्द्र ऐरीलाई दिइएको छ। टोलीमा कुशल भुर्तेल, लोकेश बम, कुशल मल्ल, आसिफ शेख, मोहम्मद आदिल आलम, करण केसी, नन्दन यादव, सन्दीप लामिछाने, सन्दीप जोरा, आरिफ शेख, ललित राजवंशी, गुलशन झा र सोमपाल कामी पनि समावेश छन्।

प्रतियोगिता अक्टोबर ८ देखि १७ सम्म ओमानको अल अमेरातस्थित क्रिकेट एकेडेमी मैदानमा हुनेछ। नेपाल समूह २ मा परेका कारण उसले पहिलो चरणमा कुवेत र जापानविरुद्ध प्रतिस्पर्धा गर्नेछ।

यसपटक एसिया तथा इस्ट एसिया प्यासिफिक क्षेत्रका ९ टिमले प्रतिस्पर्धा गर्नेछन्। सहभागी टोलीहरूलाई तीन–तीन समूहमा विभाजन गरिएको छ।