काठमाडौँ — मलेसियामा सम्पन्न एसीसी यू–१६ इस्टजोन कप क्रिकेट प्रतियोगिताको उपाधि नेपालले जितेको छ ।

फाइनल खेलमा सिंगापुरलाई २ विकेटले हराउँदै नेपालले प्रतियोगिताको उपाधि हाँसिल गरेको हो।

११४ रनको लक्ष्य पछ्याएको नेपालले २९ ओभरमा ८ विकेट गुमाउँदै जित हानिस्ल गरेको हो । खेलमा नेपालका लागि जोय थापाले सर्वाधिक २४ रन बनाएका छन् भने, शिवांश बजगाईंले २०, शुभम खनालले १८, प्रशिद्ध जैशीले १७, परिमार्जन यादवले १३ र अभय यादवले १० रन जोड्न सफल भएका छन्।

त्यसैगरी,अभय यादव र शुशिलबहादुर रावलले ३/३ विकेट लिएका छन् भने शुभम खनालले २ र कप्तान विपिनप्रसाद शर्माले १ विकेट लिएका हुन् ।

नेपालले यसअघि सन् २०२३ मा भएको इस्ट जोन कपको पनि उपाधि जितेको थियो । त्यसअघि एसीसीले यू-१६ इस्टर्न रिजनको नाममा प्रतियोगिता आयोजना गर्दै आएको थियो र नेपालले २०१७ र २०१९ मा पनि लगातार उपाधि जितेको थियो ।