काठमाडौं – नेपालले एसीसी महिला एसिया कप अन्तर्गत शुक्रबार भएको उद्घाटन खेलमा युएईलाई ६ विकेटले पराजित गर्दै नेपाल विजयी भएको छ । यो एसीसी महिला एसिया कपमा नेपालको पहिलो जित हो।

श्रीलंकाको डम्बुलामा भएको खेलमा युएईले दिएको ११६ रनको लक्ष्य नेपालले १६.१ ओभरमा ४ विकेट गुमाएर जित हाँसिल गरेको हो । ओपनर सम्झना खड्काले ४५ बलमा ११ चौका प्रहार गर्दै बलियो ब्याटिङ प्रदर्शन गर्दै अविजित ७२ रन बनाएर टोलीको आशा जगाइन् । पूजा महतो ७ रन बनाएर नटआउट रहिन् ।

नेपालका लागि सिता रानामगरले ७ रन, कविता कुँवरले २ रन र कप्तान इन्दु बर्माले ६ रन जोडिन् । पूर्व कप्तान रुबिना क्षेत्रीले १० रन बनाएर प्याभिलियन फर्किइन् ।

बलिङतर्फ युएईकी कविशा गोडागले ३ र लावन्या केनीले १ विकेट लिए ।

यसअघि नेपालले टस जितेर पहिले बलिङ गर्ने निर्णय गरेको थियो । युएईका लागि खुशी शर्माले सर्वाधिक ३६ रन र कविसा गोडागले २२ रन जोडिन् ।

नेपालका लागि कप्तान इन्दु बर्माले ३ विकेट लिए भने कृतिका मरासिनी र सबनम राईले एक एक विकेट लिए ।

समूह ‘ए’ मा रहेको नेपालले जुलाई २१ मा पाकिस्तान र २३ जुलाईमा भारतसँग प्रतिस्पर्धा गर्नेछ । समूह ‘बी’ मा बंगलादेश, श्रीलंका, मलेसिया र थाइल्याण्ड रहेका छन् । प्रत्येक समूहबाट शीर्ष दुई टोली सेमिफाइनलमा पुग्नेछन्।