बजेट तर्जुमा गर्दा अनाधिकृत व्यक्तिको संलग्नताबारे छानबिन गर्न गठित संसदीय विशेष छानबिन समितिको म्याद थप गर्ने प्रक्रिया सुरु भएको छ ।

संसदीय विशेष छानविन समितिले तोकिएको अवधिमा काम सम्पन्न गर्न नसकेकाले आजको संसद बैठकमा सभामुख अग्निप्रसाद सापकोटाले समितिलाई थप समय उपलब्ध गराउने विषय संसद बैठकको कार्यसूचीमा समावेश गरिएको जानकारी दिनुभएको छ । यसअघि अनुसन्धानका लागि १० दिनको समय दिइएको भएपनि, निर्धारित समयमा काम नसकिएपछि समितिका सचिव सुरेन्द्र अर्यालले आवश्यक समय थप्न आग्रह गर्नुभएको हो । अर्यालले अनुसन्धानको लागि प्रहरीलाई उपलब्ध गराएको सीसीटीभी फुटेजको प्रतिवेदन पनि आइनसकेको र कहिले आउने भन्ने टुंगो नभएकोले पनि थप समय आवश्यक पर्ने बताउनुभएको छ।

छानबिनका क्रममा समितिले निवर्तमान अर्थमन्त्री शर्मासँग आज करिब ३ घण्टा सोधपुछ गरेको थियो । शर्माले बजेट निर्माणमा अर्थ मन्त्रालयका सरोकारवाला अधिकारीबाहेक अन्य कर्मचारी संलग्न भएको आरोप अस्वीकार गर्नुभएको थियो ।

बजेट निर्माणमा अनाधिकृत व्यक्तिको संलग्नता भएको कुरा सार्वजनिक भएपछी राजीनामा दिएका अर्थमन्त्री जनार्दन शर्मालाई प्रतिनिधिसभाको विशेष छानविन समितिले आज बयान लिने भएको छ।

बजेट निर्माणमा अनधिकृत व्यक्तिको संलग्नताबारे छानबिन गर्न गठित संसदीय विशेष समितिले यस अघि नै अर्थ मन्त्रालय अन्तर्गतका १० जना अधिकारीहरुसँग बयान लिएको छ। बयानका क्रममा मन्त्रालयका अधिकारीहरुले बजेट निर्माणमा अनधिकृत व्यक्ति प्रवेश गरेको भन्ने विषयको प्रतिवाद गरेका थिए। बयान अघि समितिले जेठ १४ गते मध्यान्ह १२ बजेदेखि १५ गते मध्यान्ह १२ बजेसम्मको सीसीटीभी फुटेज उपलब्ध गराउन गरेको आग्रहमा अर्थमन्त्रालयले भने १३ दिनको मात्र फुटेज रहने र अरु क्रमशः मेटिँदै जाने भन्दै असारको मात्र फुटेज उपलब्ध गराएको थियो।
प्रमाण नष्ट गराउन सिसिटिभी फुटेज मेटाएको हुनसक्ने विभिन्न चर्चा र बहसकोबीच छानविन समितिले सीसीटीभी फुटेज रिकभर गर्न नेपाल प्रहरी अन्तर्गतको फरेन्सिक ल्याबमा पठाउने भएको छ । यधपी प्रहरीले भने सीसीटीभी फुटेज रिकभर गर्न सकिने वा नसकिने भन्ने कुरा हार्डडिक्सको अवस्थामा भरपर्ने बताएको छ।

यी तमाम घटनाहरुकोबीच छानविन समितिले आज जनार्दन शर्मासंग बयान लिनेछ। घटनाक्रम अनुसार अहिलेसम्म अर्थ मन्त्रालयका अधिकारीहरुसंग लिएको बयानलाई मात्र आधार मान्ने हो भने पनि समितिले शर्मा विरुद्द कुनै त्यस्तो ठोस प्रमाण जुटाउन सकेको छैन। यधपी आज शर्माको बयानमा उनले के भन्नेछन भन्ने कुरा भने चासोको विषय बनेको छ।

अर्थमन्त्री जर्नादन शर्मालाई फिर्ता बोलाउने विषयमा नेकपा माओवादी केन्द्रभित्रै आन्तरिक छलफल सुरु भएको छ।

पटक पटक विवादमा तानिएका अर्थमन्त्री शर्मालाई फिर्ता बोलाउने विषयमा अहिले माओवादी केन्द्रका प्रतिनिधिहरु आन्तरिक छलफलमा जुटेका छन्। अर्थमन्त्रीको काम कारवाहीको विषयलाई लिएर माओवादी केन्द्रनै विवादमा तानिने र पार्टीको छवि बिग्रने अवस्थामा पुगेपछि अध्यक्ष प्रचण्डले अर्थमन्त्री शर्मालाई निजि निवास खुमलटार बोलाएर करिब २ घण्टा भन्दा बढी समय यस विषयमा छलफल गरिएको जानकारी प्राप्त भएको छ।

त्यसो त गर्भर्नर निलम्बन प्रकरण र आफ्ना विवादित अभिव्यक्तीका कारण पटक पटक आलोचित बन्दै आएका शर्मालाई यस अघि पनि हटाउनुपर्ने माग उठेको थियो। तर बजेट सार्वजनिक गर्ने समयमा अर्थमन्त्री हटाउँदा यसले नराम्रो संदेश जाने भन्दै यो विषय यतिकै ओझेलमा पर्यो। तर पछिलो समय सिमित व्यक्ति र संस्थालाई लाभ पुग्ने गरि बजेट तयार गरिएको विषयलाई लिएर सरकारको आलोचना सुरु भएपछी अहिले उनलाई हटाउनेबारे आन्तरिक छलफल सुरु भएको हो।