त्रिवि २४, २५ र २६ गतेका स्नातक तहका परीक्षा स्थगित

Posted on २३ भाद्र २०८२, सोमबार२३ भाद्र २०८२, सोमबार by नेपाल राष्ट्रिय दैनिक

काठमाडौँ- त्रिभुवन विश्वविद्यालयले यही भदौ २४, २५ र २६ का लागि तय गरिएका स्नतक तहका परीक्षा स्थगित गरेको छ।

त्रिवि परीक्षा नियन्त्रण कार्यालय बल्खुका अनुसार २२ गतेदेखि सञ्चालित ४ वर्षे स्नातक तह दोस्रो वर्ष (आंशिक तथा मौका) परीक्षामध्ये उक्त दिन बिहान ७ देखि १० सम्म र दिउँसो १२ देखि ३ बजेसम्म सञ्चालन हुने परीक्षा स्थगित गरिएको हो।

त्रिवि केन्द्रीय परीक्षा सञ्चालक समितिको सोमबारको बैठकले देशमा उत्पन्न आकस्मिक असहज परिस्थिति भन्दै परीक्षा स्थगित गरेको हो। स्थगित परीक्षाहरु असोज २, ४ र ५ गते सोही समय र सोही परीक्षा केन्द्रमा सञ्चालन हुने त्रिविले जनाएको छ।

सोमबार जेनजीले गरेको प्रदर्शनमा ठूलो संख्यामा मानवीय क्षति र घाइते भएसँगै उपत्यका र अन्यत्र समेत कर्फ्यु आदेश जारी गरिएको छ।

त्रिविमा पद रिक्त हुनुभन्दा तीन महिना अगाडि पदाधिकारी नियुक्त गर्न निर्देशन

Posted on १ भाद्र २०८२, आईतवार१ भाद्र २०८२, आईतवार by नेपाल राष्ट्रिय दैनिक

काठमाडौं – राष्ट्रिय सभाको सार्वजनिक नीति तथा प्रत्यायोजित विधायन समितिले त्रिभुवन विश्वविद्यालय (त्रिवि) का उपकुलपति लगायत पदाधिकारीको पद रिक्त हुनुभन्दा कम्तीमा तीन महिना अगाडि नयाँ नियुक्ति गर्न निर्देशन दिएको छ।

समितिको प्रतिवेदनमा संविधानअनुसार त्रिविको संरचना पुनर्गठन गर्न नयाँ ऐन आवश्यक भएको उल्लेख छ। साथै पदाधिकारीहरूको पारिश्रमिक, सेवा सुविधा नियममै तोक्नुपर्ने तर त्रिविले विनियममार्फत आफैं तोकेको गैरकानुनी रहेको बताइएको छ।

त्यसैगरी कर्मचारी कल्याण कोष, औषधि उपचार कोष, कर्मचारी सापटी कोषजस्ता कोष विनियमबाट होइन, ऐनमार्फत मात्र स्थापना गर्नुपर्ने समितिको निष्कर्ष छ।

समितिले त्रिविले ३५ विनियम, १६ कार्यविधि, १७ निर्देशिका र १९ कार्यप्रणाली कार्यकारी परिषद्को नाममा बनाएको अवस्थालाई अधिकार नाघेको भन्दै सुधार गर्न सुझाव दिएको छ।

त्रिविको ताला खुलाउन सर्वोच्चको आदेश

Posted on १८ असार २०८२, बुधबार१८ असार २०८२, बुधबार by नेपाल राष्ट्रिय दैनिक

काठमाडौँ — त्रिभुवन विश्वविद्यालयमा ३४ दिनदेखि जारी तालाबन्दी खुलाउन सर्वोच्च अदालतले गृह मन्त्रालय, प्रहरी प्रधान कार्यालय र प्रहरी वृत्त कीर्तिपुरको नाममा बुधबार अन्तरिम आदेश जारी गरेको छ ।

तालाबन्दी नगर्नु/नगराउनु, ताला लगाएको भए खोल्नु/खोलाउनु भनेर अन्तरिम आदेश जारी गरेको त्रिविका कानुनी सल्लाहकार नारायण खनालले बताएका छन् ।

अधिवक्ता महेश भट्टराईलगायतले त्रिविको उपकुलपति, रेक्टर, रजिष्ट्रार, सेवा आयोगलगायत कार्यालयमा भएको तालाबन्दी खुलाउन माग गर्दै सर्वोच्चमा रिट दर्ता गराएका थिए । मंगलबार दर्ता भएको रिटमा गृह मन्त्रालय, प्रहरी प्रधान कार्यालय, जिल्ला प्रशासन कार्यालय काठमाडौं, प्रहरी वृत्त कीर्तिपुर, उपकुलपति, रजिष्ट्रार कार्यालयलाई विपक्षी बनाइएको थियो ।

त्रिवि आंशिक प्राध्यापक केन्द्रीय समितिका अध्यक्ष गोकुल लेछवा लिम्बु, सहअध्यक्ष राजेन्द्र आचार्य, महासचिव बैकुण्ठ थापा र अखिल नेपाल राष्ट्रिय स्वतन्त्र विद्यार्थी युनियन क्रान्तिकारी त्रिविका कार्यवाहक अध्यक्ष शिवराज भट्टसमेत विपक्षी थिए ।

जेठ १४ गते नेविसंघबाट विभिन्न क्याम्पसमा स्ववियुमा निर्वाचित केही पदाधिकारीले उपकुलपति कार्यालयमा तोडफोड गर्दै तालाबन्दी गरेका थिए । त्यस्तै आंशिक प्राध्यापक संघले जेठ ३० गते उपकुलपतिसहित रजिष्ट्रार, रेक्टर र सेवा आयोग कार्यालयमा तालाबन्दी गरेको थियो ।

नेविसंघ केन्द्रीय समिति र स्ववियुबाट निर्वाचितहरुले भने तालाबन्दीको आधिकारिक जिम्मेवारी लिएका छैनन् । प्राध्यापक संघले भने तालाबन्दीको जिम्मेवारी लिँदै पदाधिकारी, कर्मचारीलाई कार्यालय आउजाउ र बाहिर बसेर कामकाज गर्न पनि अवरोध गर्दै आएको छ ।

त्रिविको जग्गा हिनामिना गर्नेलाई कानुनी दायरामा ल्याउछौं : प्रधानमन्त्री

Posted on ३ पुष २०८१, बुधबार३ पुष २०८१, बुधबार by नेपाल राष्ट्रिय दैनिक

काठमाडौं : त्रिभुवन विश्वविद्यालयको जग्गा तथा सम्पत्ति खोजबिन आयोगको प्रतिवेदन प्राप्त भएको भन्दै प्रधानमन्त्री ओलीले सिफारिस भएका तथ्यहरूमाथि थप अनुसन्धान गरेर कानुनी प्रकृया अगाडी बढाउने बताएका छन्।

त्रिभुवन विश्वविद्यालयको जग्गा तथा सम्पत्ति खोजबिन गर्न गत जेठ १७ गते पूर्वसचिव शारदाप्रसाद त्रितालको संयोजकत्वमा गठित पाँच सदस्यीय आयोगले प्रधानमन्त्री ओलीसमक्ष प्रतिवेदन बुझाएको छ।

बुधबार सामाजिक सञ्जालमै लेख्दै प्रधानमन्त्री ओलीले आयोगले अध्ययन गर्न नभ्याएका र नसकेका क्षेत्रलाई पनि थप अनुसन्धान गरी खोजिने बताएका छन्।

२०१३ सालदेखिका त्रिविको कीर्तिपुर,नैकाप, ढुंगेअड्डा,पाटनलगायत काठमाडौं उपत्यकाका २१ क्याम्पसका जग्गाको अवस्था दुरुपयोग भएको प्रतिवेदनमा उल्लेख छ। आयोगले यसअघि मंसिर १४ गते शिक्षा,विज्ञान तथा प्रविधिमन्त्री भट्टराईलाई प्रतिवेदन बुझाएको थियो।

प्रतिवेदनमा २०१३ साल नैकाप,ढुंगे अड्डाको १२५ रोपनी अतिक्रमणमा परेको छ। यो जग्गा किनबेच पनि भइसकेको छ। सर्वोच्च अदालतले यो जग्गा त्रिविकै भएको फैसला पनि गरिसकेको छ। त्रिभुवन विश्वविद्यालयको कीर्तिपुर-बल्खु क्षेत्रको १००० रोपनी जग्गा संकु्चनमा रहेको प्रतिवेदनमा उल्लेख छ। समितिले ललितपुरको लुभुमा रहेको ३७५ रोपनी खोजविन पहिचान गरेको छ। लेब्रोटोरी स्कुलले १०९ रोपनी ,बागवानी केन्द्रको २८१ पनि त्रिविको जग्गा भएको प्रतिवेदनले देखाएको छ।

त्रिविमा ८ डीन नियुक्त

Posted on ३० मंसिर २०८१, आईतवार३० मंसिर २०८१, आईतवार by नेपाल राष्ट्रिय दैनिक

त्रिभुवन विश्वविद्यालयका आठ संकायमा डीन नियुक्त भएका छन्। त्रिभुवन विश्वविद्यालय कार्यकारी परिषदको बैठकले विभिन्न ८ संकायमा डीन र तीन निर्देशनकहरू नियुक्त गरेको हो।

मानविकी तथा सामाजिकशास्त्र संकायमा प्राध्यापक डा. दुबिनन्द ढकाल, चिकित्साशास्त्र अध्ययन संस्थानमा प्राध्यापक डा. मोहनराज शर्मा, कृषि तथा पशुविज्ञान अध्ययन संस्थानमा डा. किशोरचन्द्र दाहाल, शिक्षाशास्त्र संकायमा प्राध्यापक डा. बेदराज आचार्य, वन विज्ञान अध्ययन संस्थानमा डा. ठाकुर सिलवाल , इन्जिनियरिङ अध्ययन संस्थानमा प्राध्यापक डा. सुशीलबहादुर बज्राचार्य र विज्ञान तथा प्रविधि अध्ययन संस्थानमा प्राध्यापक डा. शंकर खनाल नियुक्त भएका छन्।

त्यस्तै डा. लक्ष्मीकान्त शर्मालाई योजना निर्देशनालयका निर्देशक, डा. राजेन्द्र कुँवरलाई शिक्षा, विकास तथा अनुसन्धान केन्द्रको कार्यकारी निर्देशक र प्राध्यापक डा. मिनाराज भण्डारीलाई व्यवहारिक विज्ञान तथा प्रविधि अनुसन्धान केन्द्रको कार्यकारी निर्देशक नियुक्त गरिएको छ ।

३ वर्षपछी सहायक प्राध्यापकको परीक्षा लिँदै त्रिवि

Posted on ३ श्रावण २०८१, बिहीबार३ श्रावण २०८१, बिहीबार by नेपाल राष्ट्रिय दैनिक

काठमाडौं – त्रिभुवन विश्वविद्यालय (त्रिवि)ले ३ वर्ष देखि स्थगित भएको सहायक प्राध्यापक परीक्षा सञ्चालन गर्ने घोषणा गरेको छ ।

त्रिवि सेवा आयोगले बुधबार एक सूचना जारी गर्दै सहायक प्राध्यापक पदका लागि भाद्र ५ गतेबाट परीक्षा सञ्चालन हुने जनाएको छ ।

त्रिवि सेवा आयोगको अनुसार पहिलो चरणमा चिकित्साशास्त्र अध्ययन संस्थानसँग सम्बन्धित विषयको परीक्षा लिइनेछ ।

त्रिवि सेवा आयोगका अनुसार अन्य संस्थान र संकायसँग सम्बन्धित अन्य विषयको परीक्षा तालिका छिट्टै प्रकाशित गरी आयोगको वेवसाइटमा प्रकाशित गरिने छ ।

त्रिविको परीक्षा सम्बन्धी सम्पूर्ण सेवा अब अनलाइन मार्फत

Posted on १६ माघ २०८०, मंगलवार१६ माघ २०८०, मंगलवार by नेपाल राष्ट्रिय दैनिक

ललितपुर – मुलुककै पुरानो विश्वविद्यालयले ७४औँ वार्षिकोत्सवको अवसर पारेर अनलाइन सेवा सञ्चालन गरेको छ ।त्रिभुवन विश्वविद्यालय (त्रिवि)ले सोमबारदेखि अनलाइन प्रणालीबाट परीक्षासम्बन्धी सेवा दिन थालेको छ ।

त्रिविका कार्यवाहक उपकुलपति प्रा शिवलाल भुसालले परीक्षा नियन्त्रण कार्यालय बल्खु, काठमाडौंमा कम्प्युटरको माउसमा क्लिक गरेर अनलाइन सेवाको शुभारम्भ गर्नुभयो ।

कार्यवाहक कुलपति भुसालले परीक्षा सम्बन्धी हरेक प्रक्रियाका लागि विश्वविद्यालयले आफ्नो सेवालाई डिजिटलाइज गरेको बताउँदै सफल हुने विश्वास व्यक्त गरे ।

यसअघि विद्यार्थीले मार्कसिट लिन बल्खुस्थित कार्यालयमा जानुपर्ने बाध्यता थियो । यो सेवा सुरु भएसँगै विद्यार्थीले घरमै बसेर प्रवेशपत्र, ट्रान्सक्रिप्ट, प्रोभिजनल सर्टिफिकेट, मार्कसिटमा सुधारलगायतका लागि आवेदन दिन सक्नेछन् ।

त्यसका लागि विद्यार्थीहरूले www.tuexam.edu.np मा लगइन गरी तोकिएका प्रमाणपत्रहरू संलग्न गरी सेवाहरूको लागि आवेदन दिनुपर्नेछ र त्यसपछि नेपाल बैंक वा ग्लोबल आइएमई बैंकमार्फत तोकिएको शुल्क तिर्नु पर्नेछ।

विद्यार्थीहरूलाई उनीहरूको आवेदन स्वीकार वा अस्वीकार गरिएको छ कि छैन भनेर कार्यालय समयमा सूचित गरिनेछ। कार्यवाहक उपकुलपति भुसालले अस्वीकृत भएमा त्रुटि सच्याई वा छुटेको विवरण भरेर पुनः आवेदन दिन सकिने पनि बताएका छन्।

यस्तो छ उच्च शिक्षा विधेयकको मस्यौदा

Posted on १० माघ २०८०, बुधबार१० माघ २०८०, बुधबार by नेपाल राष्ट्रिय दैनिक

काठमाडौं – सरकारले उच्च शिक्षा विधेयकको मस्यौदा सार्वजनिक गर्दै सुझाव आह्वान गरेको छ । शिक्षा, विज्ञान तथा प्रविधि मन्त्रालयले मस्यौदा सार्वजनिक गर्दै १५ दिनभित्र देश–विदेशबाट सुझाव पठाउन आह्वान गरेको हो ।

सरकारले सार्वजनिक गरेको मस्यौदामा नेपालमा केन्द्रीय, प्रदेश र मानित गरी तीन प्रकारका विश्वविद्यालय रहने कल्पना गरिएको छ ।

हाल सञ्चालनमा रहेका मध्ये त्रिभुवन विश्वविद्यालय, नेपाल संस्कृत विश्वविद्यालय, कृषि तथा वन विश्वविद्यालय, नेपाल खुला विश्वविद्यालय, लुम्बिनी वौद्ध विश्वविद्यालय र काठमाडौं विश्वविद्यालयलाई केन्द्रीय विश्वविद्यालयमा राखिएको छ । त्रिभुवन विश्वविद्यालयलाई भने ऐतिहासिक पृष्ठभूमि, नेपालको उच्च शिक्षा क्षेत्रमा भएको योगदान, संस्थागत क्षमता र प्राज्ञिक उन्नयनको आधारमा त्रिभुवन विश्वविद्यालयलाई प्राज्ञिक उत्कृष्टताको केन्द्रको रुपमा प्रस्ताव गरेको छ ।

हाल सञ्चालनमा रहेका अन्य विश्वविद्यालयलाई भने पाँच वर्षभित्र केन्द्रीय विश्वविद्यालयको रुपमा स्तरोन्नति हुन नसके प्रदेश विश्वविद्यालयमा घटुवा हुने प्रावधान प्रस्ताव गरिएको छ । विधेयकको मस्यौदामा प्राज्ञिक उत्कृष्टताको केन्द्रका रुपमा वर्गीकृत विश्वविद्यालयको कुलपति प्रधानमन्त्री हुने व्यवस्था गरिएको छ ।

केन्द्रीय विश्वविद्यालयको कुलपति वा सभापति शिक्षा मन्त्री र प्रदेश विश्वविद्यालयको कुलपति मुख्यमन्त्री रहने व्यवस्था छ । गैरनाफामूलक विश्वविद्यालयमा भने बोर्ड अफ ट्रष्टिजको प्रमुख सभापति वा चेयरमेन हुनेछ ।

मस्यौदाले शिक्षामन्त्रीको अध्यक्षतामा उच्च शिक्षा आयोगको परिकल्पना गरेको छ । मुलुकको उच्च शिक्षा व्यवस्थापन गरी उच्चस्तरीय मानव संशाधनको आवश्यकता परिपूर्तिका लागि उच्च शिक्षाको नियामक निकायका रुपमा एक उच्च शिक्षा आयोग रहने उल्लेख गरिएको छ ।

सात सदस्यीय सदस्य सहितको आयोगमा दुई जना महिला अनिवार्य रहने व्यवस्था गरेको छ । मस्यौदामा केन्द्रीय विश्वविद्यालयको शिक्षक तथा कर्मचारीको नियुक्ति र बढुवा गर्न एक विश्वविद्यालय सेवा आयोग रहने परिकल्पना गरिएको छ ।

त्रिविको उपकुलपति बन्न ४३ जनाको आवेदन

Posted on ९ माघ २०८०, मंगलवार९ माघ २०८०, मंगलवार by नेपाल राष्ट्रिय दैनिक

काठमाडौं : त्रिभुवन विश्वविद्यालय (त्रिवि)को उपकुलपति पदका लागि २ महिला र ४१ पुरुष गरि कुल ४३ जनाले आवेदन दिएका छन् ।

कुलपति एवम् प्रधानमन्त्री पुष्पकमल दाहाल प्रचण्डले खुला प्रतिस्पर्धाको आधारमा उपकुलपति छनोट प्रक्रिया अघि बढाउन निर्देशन दिएपछि सहकुलपतिसमेत रहेका शिक्षा मन्त्री अशोक कुमार राई नेतृत्वको सिफारिस समितिले पुस तेस्रो साता आवेदन माग गरेको थियो ।

उपलकुलपति बन्ने इच्छा व्यक्त गर्दै आवेदन दिनेहरुमा त्रिविका निमित्त उपकुलपति प्रा.डा. शिवलाल भुसाल, मध्यपश्चिम विश्वविद्यालयका उपकुलपति प्रा.डा. नन्दबहादुर सिंह, त्रिविका पूर्वउपकुलपति प्रा.डा. तीर्थराज खनियाँ, खुला विश्वविद्यालयका पूर्वउपकुलपति प्रा.डा. लेखनाथ शर्मा, पोखरा विश्वविद्यालयका पूर्वउपकुलपति प्रा.डा. केशरजंग बराल छन् ।

यसैगरी त्रिविका त्रिविका पूर्व उपकुलपति प्रा.डा. कुसुम शाक्य, त्रिविका पूर्व रजिष्ट्रार प्रा.डा. चन्द्रमणि पौडेल, त्रिविका पूर्व रेक्टर गुणनिधि न्यौपाने, खुला विश्वविद्यालयका कार्यवाहक उपकुलपति प्रा.डा. इन्द्र कार्की, त्रिविको इतिहास विभागका पूर्वप्रमुख प्रा.डा. राजकुमार पोख्रेलले पनि निवेदन दिएका छन् ।

यसैगरी प्रा.डा. टंकनाथ धमला, प्रा.डा. आनन्दबल्लभ जोशी, प्रा.डा. अक्कलजेभ मिश्र, प्रा.डा. ऋदिश कुमार पोखरेल, प्रा.डा. ज्ञानेन्द्र प्रसाद पौडेल, प्रा.डा. महेन्द्र चालिसे, प्रा.डा. भोजराज अर्याल, प्रा.डा. नारायण प्रसाद बेल्बासे, प्रा.डा. हेमराज शर्मा, प्रा.डा. वेदनाथ शर्मा, प्रा.डा. प्रकाश घिमिरे (काठमाडौं), प्रा.डा. प्रकाश घिमिरे (गोरखा)ले पनि आवदेन दिएका छन् ।

प्रा.डा. केदारनाथ घिमिरे, प्रा.डा. महेन्द्रप्रसाद शर्मा, प्रा.डा. विनोद पराजुली, प्रा.डा. देवबहादुर खड्का, प्रा.डा. कृष्णराज तिवारी, प्रा.डा. गोविन्द सुवेदी, प्रा.डा. नवराज देवकोटा, प्रा.डा. रामप्रसाद रेग्मी, प्रा.डा. चित्रबहादुर बुढाथोकी, प्रा.डा. त्रिरत्न बज्राचार्य, प्रा.डा. एकराज ओझा र प्रा.डा. प्रमोद कुमार झाको पनि आवेदन परेको छ ।

यसैगरी डा. रामचन्द्र बस्नेत, डा. विनय कुमार झा, डा. नारायण शुभ पाठक, नारायणप्रसाद पाठक, संगीता रायमाझी, सन्जय आचार्य, सूर्यबहादुर थापा, भिमसेन देवकोटा र बालमुकुन्द रेग्मीले पनि त्रिविको उपकुलपतिका लागि आवेदन दिएका छन् ।

त्रिविले आवेदकहरुमध्येबाट प्रस्तुतीकरणको मूल्यांकन र अन्तर्वार्ता लिएर सर्वोत्कृष्ट अंक पाउने तीन जनाको नाम शिक्षा मन्त्री नेतृत्वको सिफारिस समितिले कुलपति एवम् प्रधानमन्त्रीलाई बुझाउँछ । ती तीन जनामध्ये एक जनालाई कुलपतिले उपकुलपति नियुक्त गर्ने छन् ।

नक्कली शैक्षिक प्रमाणपत्र लिएको आरोपमा सातजना पक्राउ

Posted on २ भाद्र २०८०, शनिबार२ भाद्र २०८०, शनिबार by नेपाल राष्ट्रिय दैनिक

काठमाडौँ- नेपाल प्रहरीले एमबीबीएस कोर्ष अध्ययन गर्न जाने प्रयोजनका लागि शैक्षिक प्रमाणपत्र नक्कली बनाएको आरोपमा सातजनालाई पक्राउ गरेको छ।

प्रहरीको केन्द्रीय अनुसन्धान ब्यूरो (सीआईबी)ले नक्कली शैक्षिक प्रमाणपत्रविरुद्ध सञ्चालन गरेको ‘अप्रेसन’मा एमबीबीएस अध्ययन गर्न जाने प्रयोजनका लागि आफ्नो शैक्षिक योग्यताको प्रमाणपत्र नक्कली बनाएकाले उनीहरुलाई पक्राउ गएिको सीआईबीले जनाएको छ।

पक्राउ परेका सातजनालाई सीआईबीले शुक्रबार राति सार्वजनिक गरेको छ।

पक्राउ पर्नेमा अनु फार्मेसी विराटनगरमा कार्यरत मोरङका ३४ वर्षीय मनित चौधरी, त्रिभुवन विश्वविद्यालय शिक्षण अस्पताल महाराजगञ्जमा कार्यरत बाराका ३४ वर्षीय अमित चौधरी, एमडी अध्ययनको तयारी गरेकी काठमाडौँकी २९ वर्षीया एरिना शाह, इसान बाल अस्पताल वसुन्धरामा कार्यरत ललितपुरकी ३३ वर्षीया श्रद्धा शिल्पकार, काठमाडौँका २८ वर्षीया पुनम थापा, बागमती अस्पताल रौतहटमा कार्यरत सिरहाका ३२ वर्षीय रामबाबु यादव र चितवन मेडिकल कलेजमा अध्ययनरत सप्तरीका २८ वर्षीय नसिम अख्तर रहेका छन्।

ब्यूरोका प्रवक्ता एवं प्रहरी उपरीक्षक सञ्जयसिंह थापाले शैक्षिक योग्यतामा अंक वास्तविकभन्दा थपघट गरी काम गरिरहेको र पढिरहेकाहरुलाई पक्राउ गरिएको जानकारी दिए।

प्रहरीले राष्ट्रिय परीक्षा बोर्ड, परीक्षा नियन्त्रण कार्यालय, सानोठिमी, भक्तपुरलाई पत्राचार गरी यकिन गरी नक्कली भएको आधारमा उनीहरुलाई पक्राउ गरी अनुसन्धान गरेको हो।

पक्राउ परेका सातैजनालाई काठमाडौँ जिल्ला अदालतबाट पाँच दिनको म्याद थप गरी अनुसन्धान भइरहेको प्रवक्ता थापाले बताए। रासस

रेशम चौधरीको नेतृत्वमै टीकापुर घटना भएको सर्वोच्चको ठहर

त्रिभूवन विश्वविद्यालयको समस्या समाधान गर्न सभामुखको रुलिङ

Posted on १३ भाद्र २०७९, सोमबार१३ भाद्र २०७९, सोमबार by नेपाल राष्ट्रिय दैनिक

त्रिभूवन विश्वविद्यालयमा देखिएको समस्या शिघ्र समाधान गर्न सभामुख अग्निप्रसाद सापकोटाले सरकारलाई रुलिङ गर्नुभएको छ।

आज बसेको प्रतिनिधि सभा बैठकमा सभामुख सापकोटाले त्रिभूवन विश्वविद्यालयमा तालाबन्दी लगायतका विरोधका कार्यक्रमले पठनपाठन प्रभावित भएकोप्रति ध्यानाकर्षण भएको बताउंदै सो समस्यालाई शिघ्र समाधान गर्न सरकारलाई निर्देशन दिनुभएको हो।

यसअघि प्रतिनिधि सभा बैठकमा समय माग गरेर नेकपा एमालेका सांसद प्रदीपकुमार ज्ञवालीले त्रिभूवन विश्वविद्यालयमा प्राध्यापकलाई आक्रमण गर्नेहरुमाथि कारबाही नगरिएकोप्रति आपत्ति जनाउँदै उक्त समस्या समाधानका लागि सभामुखले सरकारलाई रुलिङ गर्न माग गर्नुभएको थियो।

सांसद ज्ञवालीले, प्रधानमन्त्री र गृहमन्त्री स्वयं विद्यार्थी राजनीतिबाट मुलुकको शीर्ष स्थानमा पुगेको उल्लेख गर्दै,उहाँहरुले आफ्नो विद्यार्थी संगठनलाई गुण्डागर्दी गर्न सिकाएको हो भन्ने प्रश्न समेत गर्नुभएको थियो।

अस्पतालको सेवा बन्द गरेर राष्ट्रपतिको कार्यक्रममा उपस्थित हुन निर्देशन

Posted on ३२ असार २०७९, शनिबार३२ असार २०७९, शनिबार by नेपाल राष्ट्रिय दैनिक

चिकित्सा शास्त्र अध्ययन संस्थानले अस्पतालको आकस्मिक बाहेकका सबै सेवा बन्द गरेर संस्थानको ५०औँ वार्षिकोत्सव समारोहमा उपस्थित हुन उर्दी जारी गरेको छ।

श्रावण १ गते, दिउँसो १२:३० बजे नेपाल प्रज्ञा प्रतिष्ठान, कमलादीमा हुने कार्यक्रममा राष्ट्रपति बिध्या देवी भण्डारीको उपस्थिति रहने भन्दै, उक्त कार्यक्रमका लागि अस्पतालको आकस्मिक बाहेकका सबै सेवा बन्द गरेर कार्यक्रममा उपस्थित हुन उर्दी जारि गरिएको छ।

चिकित्सा शास्त्र अध्ययन संस्थानकी डिन दिव्या सिंह शाहले त्रि वि शिक्षण अस्पताल, मनमोहन कार्डियोथोरासिक भास्कुलर एन्ड ट्रान्सप्लान्ट सेन्टर र बीपी कोइराला लाइन्स नेत्र अध्ययन केन्द्रलाई लेखेको पत्रमा आकस्मिक बाहेक सबै सेवा बन्द गरेर विभागीय प्रमुख लगायत सबै फ्याकल्टीहरुलाई कार्यक्रममा उपस्थित हुन निर्देशन गरिएको छ।

त्रिवि केन्द्रीय कार्यालय कीर्तिपुरमा नेविसंघको ताला

Posted on १९ जेष्ठ २०७९, बिहीबार१९ जेष्ठ २०७९, बिहीबार by नेपाल राष्ट्रिय दैनिक

नेपाली कांग्रेसको भातृ संगठन नेपाल विद्यार्थी संघले त्रिभुवन विश्वविद्यालयको केन्द्रीय कार्यालय कीर्तिपुरमा ताला लगाएको छ ।

आज एक विज्ञप्ति जारी गर्दै नेपाल विद्यार्थी संगठनले त्रिवि केन्द्रिय कार्यालयमा ताला लगाएको जनाएको छ। आफ्ना मागहरु सम्बोधन नगरिएको भन्दै नेविसंघले कार्यालयमा ताला लगाएको र आफ्ना मागहरु सम्बोधन नगरीएमा आफुहरु प्रतिवादमा उत्रिने चेतावनी पनि विज्ञप्तिमा उल्लेख गरिएको छ।

नेपाल विद्यार्थी संघले यसअघि पनि त्रिवि केन्द्रिय कार्यालयमा ताला लगाएको र सो ताला नेपाल कम्युनिष्ट पार्टी (क्रान्तीकारी) मध्ये केन्द्रीय कमाण्डको लेटर प्याडमा इन्चार्ज सफलको हस्ताक्षर सहित नक्कली विज्ञप्ति टाँस गरी फुटाउनु खेदजनक भएको पनि विज्ञप्तिमा उल्लेख गरिएको छ।

ट्रेन्डिङ