हेटौंडा — बागमती प्रदेशका मुख्यमन्त्री इन्द्रबहादुर बानियाँले शुक्रबार कांग्रेसका पाँच नयाँ मन्त्री नियुक्त गर्दै मन्त्रिपरिषद् पूर्णता दिएका छन्। यसअघि २० साउनमा आफूसहित ८ मन्त्री नियुक्त भएका थिए।

नव नियुक्त मन्त्रीमा काभ्रेका कञ्चनचन्द्र बादे (सामाजिक विकास), रसुवाका प्रभात तामाङ (आर्थिक मामिला तथा योजना), ललितपुरकी उर्मिला केसी नेपाल (युवा तथा खेलकुद), भक्तपुरका सुरेश श्रेष्ठ (संस्कृति तथा पर्यटन) र चितवनकी बिनु रायमाझी पौंडेल (सहकारी तथा गरिबी निवारण) रहेका छन्।

२० साउनमा कांग्रेसका कृष्ण तामाङ र शिवराज अधिकारीलाई पनि मन्त्रालयको जिम्मेवारी दिइएको थियो भने एमालेबाट ६ मन्त्रीले विभिन्न मन्त्रालय सम्हालेका छन्। कांग्रेस र एमालेबीचको पुरानो सहमतिअनुसार दुवैले मुख्यमन्त्रीसहित ६–६ मन्त्रालय पाएका छन्।

तर, पूर्वमुख्यमन्त्री बहादुर सिंह लामा पक्षका तीन सांसदलाई मन्त्री बनाउनुपर्ने अडान पुरा नगरेको भन्दै कांग्रेसभित्र असन्तुष्टि देखिएको छ।आफुले चुनेको ३ जनालाई मन्त्री नबनाएसम्म विश्वासतको मत निदने अडान लिएको बहादुर लामा पक्षले २७ साउनमा प्रदेश सभा बैठकमा उपस्थित भएर विश्वासको मत दिएका थिए ।निवर्तमान मुख्यमन्त्री लामाले केन्द्रीय नेतृत्वहरूले ३ जनालाई मन्त्री बनाउने सहमति कार्यान्वयन हुने प्रतिबद्ध दिलाएपछि विश्वासको मत दिएको बताएका थिए । तर बानियाले लामा पक्षका कसैलाई पनि मन्त्रिमण्डलमा समावेश गरेनन्।यदि लामा र बनियाबिच यहि विषयमा असहमति बढ्दै गएमा प्रदेश सरकारभित्र पुनः राजनीतिक तनाव चर्किन सक्ने संकेत देखिएको छ।