काठमाडौँ- — बागमती प्रदेशका मुख्यमन्त्री बहादुरसिंह लामाले मुख्यमन्त्री पदबाट राजीनामा नदिने बताएका छन् ।

बागमती प्रदेशमा नेपाली कांग्रेसको संसदीय दलको नेतामा आफू विरुद्धको अविश्वास प्रस्ताव बहुमतले पारित भएपछि सञ्चारकर्मीसँग कुरा गर्दै उनले भने ,”कांग्रेसको संसदीय दलको नेतामा विश्वासको मत गुमाएको हो,मुख्यमन्त्रीबाट राजीनामा दिनुपर्छ भन्ने छैन” ।

यसअघि, बागमती प्रदेश सभामा रहेका कांग्रेसका ३७ सांसदमध्ये २४ जनाले बागमती संसदीय दलको नेता चयनको लागि चुनाव गर्न हस्ताक्षर समेत बुझाएका थिए । लामालाई दवाब दिनकै लागि बागमती प्रदेशका पांच जना मन्त्रीहरुले राजिनामा समेत दिएका थिए । उनीविरुद्ध परेको अविश्वासको प्रस्तावको पक्षमा २२ जना सांसद रहे भने लामाको पक्षमा १५ जना सांसद देखिए।

बागमती प्रदेश सरकारमा मुख्यमन्त्री सहित १४ वटा मन्त्रालय रहेका छन्। जसमध्ये सत्ता गठबन्धनमा आबद्ध दल नेकपा एमालेका ६ जना मन्त्री र कांग्रेसबाट सरकारमा ८ जना मन्त्री रहेका छन्।