काठमाडौँ – बागमती प्रदेशमा मुख्यमन्त्री परिवर्तनको खेल अब अन्तिम चरणमा पुगेको देखिन्छ। नेपाली कांग्रेसभित्रको आन्तरिक असन्तोष र शक्ति संघर्षबीच मुख्यमन्त्री बहादुरसिंह लामा तामाङले पदबाट राजीनामा दिने तयारी गरेको बुझिएको छ।

पार्टीभित्र लामो समयदेखि चल्दै आएको असन्तुष्टि अन्ततः सार्वजनिक रुपमा विस्फोट भयो, जब कांग्रेस संसदीय दलका २१ सांसदले लामाविरुद्ध अविश्वास प्रस्ताव दर्ता गरे। त्यसपछि संसदीय दल नेताको निर्वाचनमा इन्द्रबहादुर बानियाँ विजयी भएसँगै उनको मुख्यमन्त्रीको पदमा संकट सुरु हुन पुग्यो।

संसदीय दलको नेतामा पराजित भएपनि मुख्यमन्त्री पदबाट राजिनामा नदिने अडान राख्दै आएका लामाले,बिहीबार साँझ सभापति शेरबहादुर देउवासँग बालुवाटारमा भएको छलफलपछि भने अन्ततः पदत्याग गर्ने सहमति जनाएका हुन्।

बानियाँले सार्वजनिक रूपमा लामालाई मार्गप्रशस्त गर्न आग्रह गर्दै आएपनि , देउवाको हस्तक्षेप पछि भने घटनाक्रम अझ निर्णायक बनेको हो। बहुमत गुमाएको अवस्थामा राजीनामा नगरेर बसिरहनु अनुचित ठहरिँदै लामाले अन्ततः पदत्याग गर्ने सहमति जनाएका हुन्।

लामाले ढिलो-चाँडो औपचारिक रुपमा राजीनामा घोषणा गर्लान तर अब सबैको ध्यान एउटै प्रश्नमा केन्द्रित छ— को बन्ला बागमती प्रदेशको नयाँ मुख्यमन्त्री? संसदीय दलको नेता भएकाले इन्द्रबहादुर बानियाँको नाम प्रबल देखिए पनि, अन्तिम निर्णय राजनीतिक सहमतिमा निर्भर हुनेछ।