नाबालिग बलात्कार अभियोग लागेका सन्दीप लामिछानेलाई काठमाडौं जिल्ला अदालतले पुर्पक्षका लागि कारागार चलान गर्न आदेश दिएको छ ।

थुनछेक बहसपछि शुक्रबार न्यायाधीश माधवप्रसाद घिमिरेले आरोपित लामिछानेलाई मुद्दाको किनारा नलागेसम्म पुर्पक्षका लागि जेल चलान गर्न आदेश दिएका हुन् । लामिछानेलाई केन्द्रीय कारागार, सुन्धारा चलान गरिने भएको छ । सरकारी वकिलको कार्यालय काठमाडौंले सोमबार लामिछानेविरुद्ध १० देखि १२ वर्ष सम्म कैद र पीडितलाई अभियुक्तबाटै यथोचित क्षतिपूर्ति भराउन मागदाबी गर्दै काठमाडौं अदालतमा मुद्दा दायर गरेको थियो ।जिल्ला सरकारी वकिलको कार्यालयले लामिछानेविरुद्ध मुलुकी अपराध संहिता, २०७४ को दफा २१९ को उपदफा ३ (घ) अनुसार सजायको मागदाबी गरेको थियो ।

भदौ २१ गते गौशाला प्रहरी बृत्तमा बलात्कार आरोपमा लामिछाने विरुद्ध जाहेरी परेपछि गत असोज २० गते उनलाई त्रिभुवन विमानस्थलबाट पक्राउ गरिएको थियो ।लामिछाने विरुद्ध अन्तर्राष्ट्रिय अपराध प्रहरी संगठन (इन्टरपोल) ले डिफ्यूजन नोटिस समेत जारी गरेको थियो।

बलात्कार आरोपी सन्दिप लामिछानेलाई थप ७ दिन हिरासतमा राख्न जिल्ला अदालत काठमाडौंले अनुमति दिएको छ ।

गत बिहीबार पक्राउ परेका लामिछानेलाई जिल्ला अदालत काठमाडौंको आदेश अनुसार आश्विन २० गतेबाट गणना हुने गरेर ७ दिनको म्याद थप गरी अनुसन्धान अगाडि बढाइने प्रहरीले जनाएको छ। अनुसन्धानको क्रममा उनलाई जिल्ला सरकारी वकिलको उपस्थितिमा प्रहरीले बयान प्रक्रिया अगाडि बढाउनेछ।

लामिछाने विरुद्द १७ वर्षीया नाबालिगमाथि बलात्कार गरेको आरोपमा काठमाडौं प्रहरी वृत्त गौशालामा जाहेरी परेको थियो।

राष्ट्रिय क्रिकेट टिमका निलम्बित कप्तान सन्दीप लामिछानेविरुद्ध इन्टरपोलले ‘डिफ्युजन नोटिस’ जारी गरेको छ ।

अन्तर्राष्ट्रिय प्रहरी संगठन इन्टरपोलले लामिछानेलाई फरारको सूचीमा राख्दै डिफ्युजन नोटिस जारी गरेको हो ।इन्टरपोलले जारी गरेको ‘डिफ्युजन नोटिस’ पश्चात इन्टरपोलमा आवद्ध रहेका राष्ट्रहरुले सन्दिप लामिछाने उक्त देशमा रहे नरहेको अनुसन्धान गरी, फेला पारेमा पक्राउ गरेर नेपाल पठाउनेछ।

सन्दिप लामिछाने विरुद्ध बलात्कारको आरोपमा प्रहरीमा जाहेरी परेपछि क्यारेबियन लिग खेल्न देश बाहिर गएका लामिछाने नेपाल नफ़र्किएपछि र कहाँ रहेको भन्ने कुनै खबर नभएपछि प्रहरीले उनलाई फरारको सूचीमा राखेको हो ।

काठमाडौं जिल्ला अदालतले भाद्र २३ गते लामिछाने विरुद्ध पक्राउ पुर्जी जारी गरेको थियो।

नेपाली क्रिकेट टिमका कप्तान सन्दीप लामिछानेविरुद्ध जबरजस्ती करणीको अभियोगमा प्रहरीमा उजुरी परेको छ ।

लामिछानेविरुद्ध १७ वर्षकी नाबालिगलाई बलात्कार गरेको आरोपमा प्रहरी वृत्त गौशालामा किटानी जाहेरी दर्ता भएको जिल्ला प्रहरी परिसर, काठमाडौंले जनाएको छ।

प्रहरीका अनुसार पिडित लामिछानेको फ्यान रहेको र उनीहरुबीच स्न्याप्च्याटमा कुराकानी हुने गरेको र सामाजिक सञ्जालमार्फत नै लामिछानेले उनीसँग भेट्ने प्रस्ताव राखेपछि लामिछानेले उनलाई घुमाउन नगरकोट लिएर गएको बताइएको छ। उनले काठमाडौँको एक होस्टेलमा बस्दै आएकी पिडितले होस्टल राति ८ बजे बन्द हुने बताएपनि उनीहरु नगरकोटबाट फर्किंदा राति अबेर भैसकेको थियो। फर्किएर काठमाडौँ आएका लामिछानेले राति उनलाई एक होटलमा राखेको र जबर्जस्ति करणी गरेको बताइएको छ। यो घटना भाद्र ५ गतेको हो र घटना भएको भोलिपल्टै लामिछाने टी–२० सिरिज खेल्न केन्या गएका थिए ।

जाहेरीका आधारमा पीडितको विस्तृत स्वास्थ्य परीक्षणसमेत भइसकेको र घटनास्थलबारे अनुसन्धान सुरु गरिसकेको प्रहरीले जनाएको छ ।