जिल्ला अदालत काठमाडौंले बलात्कारको आरोप लागेका नेपाली राष्ट्रिय क्रिकेट टोलीका कप्तान सन्दीप लामिछाने विरुद्ध पक्राउ पुर्जी जारी गरेको छ।

पक्राउ पुर्जी जारी भएपछी प्रहरीले नेपाल क्रिकेट संघ (क्यान)मार्फत लामिछानेलाई फिर्ता गर्न औपचारिक आग्रह गर्ने तयारी गरेको र त्यसपछि पनि लामिछाने नआए इन्टरपोल वा अरू माध्यमबाट उनलाई नेपाल झिकाइने प्रहरीले जनाएको छ।

नेपाली राष्ट्रिय क्रिकेट टोलीबाट निलम्बन
बलात्कारको आरोप लागेका क्रिकेटर सन्दीप लामिछानेलाई नेपाल क्रिकेट संघ (क्यान) ले नेपाली राष्ट्रिय क्रिकेट टोलीबाट निलम्बन गरेको छ ।

बलात्कार आरोप लागेका नेपाली राष्ट्रिय क्रिकेट टोलीका कप्तान सन्दीप लामिछाने विरुद्ध जिल्ला अदालत काठमाडौंले पक्राउ पुर्जी जारी भए लगत्तै बसेको क्यानको बैठकले उनलाई राष्ट्रिय क्रिकेट टोलीबाट निलम्बन गरेको हो ।

क्यानले जारी गरेको विज्ञप्तिमा, लामिछाने विरुद्ध जबरजस्ती करणी कसुरमा प्रहरी वृत्त गौशालामा जाहेरी परेको र निजउपर थप अनुसन्धान गर्नका लागि सम्मानित काठमाडौं जिल्ला अदालतबाट पक्राउ पुर्जीसमेत जारी भएकोले, क्यानको कार्यसम्पादन समितिको निर्णय अनुसार उनलाई निलम्बन गरिएको जनाएको छ।