EN
अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिन आगामी अगस्ट १५ मा अलास्कामा भेटेर यूक्रेन युद्ध अन्त्यबारे छलफल गर्ने भएका छन्। रूससँग नजिक भएकाले अलास्का उपयुक्त स्थान भएको क्रेमलिनले जनाएको छ। पुटिनले ट्रम्पलाई अर्को सम्भावित शिखर बैठकका लागि मस्कोको निम्तो पनि दिएका छन्।
यो वार्ता, ट्रम्पले , यूक्रेनले युद्ध अन्त्यको लागि डोनबास र क्रिमिया त्याग्नुपर्ने संकेत दिएपछि सार्वजनिक भएको हो। मस्कोमा पुटिनले ट्रम्पका प्रतिनिधिसंग पनि यस्तो प्रस्ताव राखेको बताइन्छ। यता, यूक्रेनी राष्ट्रपति भोलोदिमिर जेलेन्स्कीले सो प्रस्तावलाई कडा रूपमा अस्वीकार गरेका छन्।
हाल यूक्रेनको करिब २०% भूभाग रूसको नियन्त्रणमा छ। रूसले यूक्रेनलाई तटस्थ राष्ट्र बनाउन, सैन्य क्षमता घटाउन, नाटो आकांक्षा त्याग्न तथा पश्चिमी प्रतिबन्ध हटाउन माग गर्दै आएपछि अघिल्ला तिन शान्ति वार्ता विफल भएका थिए।
ट्रम्पले यसअघि अगस्ट ८ सम्म रूसले युद्धविराममा सहमत हुनुपर्ने समयसीमा तोक्दै सो सहमति पुरा नभए रुसलाई थप प्रतिबन्ध लगाउने बताएका थिए। यधपी शुक्रबारसम्म ह्वाइट हाउसले कुनै नयाँ प्रतिबन्ध घोषणा गरेको छैन। अलास्काको यो बैठक २०२२ मा रूसको पूर्णस्तरीय आक्रमणपछि दुबै नेताबीचको पहिलो प्रत्यक्ष भेट हुनेछ।
