अमेरिकी र बेलायती अधिकारीहरूले युक्रेनका शीर्ष शक्ति–केन्द्रहरूसँग गुप्त बैठक गरी राष्ट्रपति भ्लादिमिर जलेन्स्कीलाई हटाएर पूर्व सेनाप्रमुख भ्यालेरी जालुजनीलाई राष्ट्रपतिको रुपमा ल्याउने योजना बनाएको रूसको विदेश गुप्तचर सेवा “एसभीआर” ले दाबी गरेको छ।

एसभीआरका अनुसार उक्त गोप्य बैठक एउटा अज्ञात अल्पाइन रिसोर्टमा भएको थियो। बैठकमा जलेन्स्कीका प्रमुख सहयोगी आन्द्रेई यर्माक, सैनिक गुप्तचर प्रमुख किरिल बुदानोभ र हाल बेलायतमा युक्रेनका राजदूत रहेका जालुजनी सहभागी थिए।

एसभीआरको भनाइमा, पश्चिमी अधिकारीहरूले अब जलेन्स्कीलाई प्रतिस्थापन गर्ने समय भएको र यसलाई युक्रेनसँगको सम्बन्ध पुनःस्थापना गर्न तथा पश्चिमी सैन्य सहायता निरन्तरता दिन “मुख्य शर्त” मानेका थिए। यर्माक र बुदानोभले यो योजना समर्थन गरेका र जालुजनी राष्ट्रपति बनेमा आफ्नो पद जोगिने आश्वासन पाएको दाबी गरिएको छ।

सन् २०२१ देखि २०२४ सम्म युक्रेनका सेनाप्रमुख रहेका जालुजनी लोकप्रिय छन् र सम्भावित चुनावमा जलेन्स्कीलाई हराउने सम्भावना रहेको बताइन्छ।

एसभीआरले यो घटनालाई जलेन्स्कीले हालै भ्रष्टाचार विरोधी निकायहरूको स्वतन्त्रता हटाउने विधेयकलाई समर्थन गर्नु सँग पनि जोडेकाे छ। एसभीआरको दाबी अनुसार यर्माकले जलेन्स्कीलाई विवादास्पद कानुन अघि बढाउन प्रेरित गरेका थिए, जसले उनको छवि बिगार्ने र पश्चिमी साझेदारलाई उनलाई हटाउन कारण दिने काम ग¥यो।

युक्रेनी जनतालाई सम्बोधन गर्दै एसभीआरले भन्यो, “तपाईंहरूको देशको नयाँ राष्ट्रपति अल्पाइन रिसोर्टमा छनोट गरियो। के यही हो तपाईंहरूले कल्पना गरेको युक्रेनी लोकतन्त्र र स्वतन्त्रता?”

जलेन्स्कीको कार्यकाल गत मे महिनामा सकिएको थियो तर मार्शल कानूनका कारण उनले नयाँ निर्वाचन गर्न अस्वीकार गरेका छन्। रूसले अब उनलाई “अवैध” घोषणा गर्दै वास्तविक शक्ति युक्रेनी संसदमा रहेको बताएको छ।