काठमाडौं – महिना दिनदेखि ठप्प रहेको अनलाइन सञ्चारमाध्यमको दर्ता तथा नवीकरण सेवा पुनः सुचारु गर्न पत्रकार महासंघले सञ्चार तथा सूचना प्रविधि मन्त्री पृथ्वीसुब्बा गुरुङलाई ७२ घण्टे अल्टिमेटम दिएको छ।

महासंघका अध्यक्ष निर्मला शर्माको नेतृत्व टोलीले मन्त्रालय पुगेर ज्ञापन पत्र बुझाउँदै तत्काल समाधानको माग गरेका थिए। ज्ञापन पत्रमा भने अनुसार, माग सम्बोधन नभए आन्दोलन चर्काउने चेतावनी दिइएको छ।

२०४८ को छापाखाना तथा प्रकाशन ऐनलाई सरकारले संशोधन गरी अनलाइन सञ्चारमाध्यमको दर्ता–नवीकरण स्थानीय प्रशासनमार्फत गर्नुपर्ने व्यवस्था गरिएको छ। तर नियमावली नबनेका कारण सेवा ठप्प भएको हो। महासचिव रामप्रसाद दाहालका अनुसार संघीय सरकार अन्तर्गत दर्ता भएका चार हजार पाँच सयभन्दा बढी अनलाइन सञ्चारमाध्यमको नवीकरण नहुँदा विज्ञापन कारोबार, प्रेस प्रतिनिधि प्रमाणपत्र वितरण र दैनिक समाचार संकलनमा समस्या परेको छ।

मन्त्री गुरुङले भने, “कानुन बनिसकेको छ, ७२ घण्टाभित्र तुरुन्त संशोधन गर्न सक्दैनौं। नियमावली बनिसकेपछि मात्र स्थानीय प्रशासनमार्फत दर्ता–नवीकरण सम्भव हुनेछ।” सचिव राधिका अर्यालले नियमावली बनाउने काम अगाडि बढाइरहेको र सहमति पाएपछि कानुन मन्त्रालयमा पठाइने जानकारी दिइन्।