वायुसेवा सञ्चालक संघले ५ बुंदे माग राख्दै आजदेखि नियमित र आकस्मिक तर्फका सम्पूर्ण उडान बन्दे गर्ने चेतावनी दिएको २४ घण्टा नबित्दै आफ्नो अडान बाट पछि हट्न बाध्य भएको छ।

नागरिक उड्डयन प्राधिकरणले वायुसेवा सञ्चालक संघलाई कारवाही गर्ने र उडान अनुमति समेत खारेज गर्ने चेतावनी दिएपछि वायुसेवा सञ्चालक संघ र नागरिक उड्डयन प्राधिकरणबीच हिजो रात अबेरसम्म भएको वार्तामा हवाई सेवा नियमित रुपमा अघि बढाउने सहमति भएको थियो। सहमति अनुसार आज बिहान ११ बजेदेखि नियमित उडान सेवा सुचारु रहनेछ।

त्रिभुवन विमानस्थलमा बढ्दो चापका कारण उडान, पार्किङ, ग्राउन्ड ह्यान्डलिङ, नेभिगेसनलगायतका समस्या बढेको भन्दै प्राधिकरणले रातिको समयमा ३८ हेलिकोप्टरमध्ये २१ वटा काठमाडौं र १७ वटा बाहिर तथा ५२ हवाईजहाजमध्ये १७ वटा काठमाडौं र ३५ वटा काठमाडौँ बाहिरका विमानस्थलमा राख्न निर्देशन दिएको थियो । हेलिकोप्टर कम्पनीलाई ७ असार र हवाईजहाज कम्पनीलाई १३ असारदेखि सो नियम लागुहुने गरि प्राधिकरणले उपत्यकाबाहिर १० वटा विमानस्थलमा तयारि समेत अगाडि बढाएको छ।

प्राधिकरणको यहि नियमले असन्तुष्ट बनेको वायुसेवा सञ्चालक संघले ५ बुंदे माग राख्दै आजदेखि नियमित र आकस्मिक तर्फका सम्पूर्ण उडान बन्दे गर्ने चेतावनी दिएको थियो। जब कि अत्यावश्यक सेवा सञ्चालन ऐन, २०१४ दफा (३) को उपदफा (१) अनुसार हवाई सेवालाई अत्यावश्यक सेवामा समावेश गरेर हडताल गर्न निषेध गरेको छ ।