वैशाख १०- पाल्पा- पाल्पाको जोरधारामा बस दुर्घटना हुँदा एक महिलाको मृत्यु भएको छ भने बसमा सवार अन्य १० यात्रु घाइते भएका छन् ।
बुटवलबाट बाग्लुङको बुर्तिबाङ जाँदै गरेको लु १ ख ५९५६ नम्बरको बस पाल्पाको सिद्धार्थ राजमार्ग अन्तर्गत पर्ने तिनाउ गाउँपालिका–५ जोरधारा नजिकै सडकबाट करीब ५० मिटर तल खसेर दुर्घटना भएको प्रहरीले जनाएको छ ।
दुर्घटनामा घाइतेहरूको उद्धार गरी उपचारको लागि अस्पताल लगिएको छ उनीहरुको लुम्बिनी मेडिकल कलेजमा उपचार भइरहेको छ ।
काठमाडौंबाट रुकुमकोटतर्फ गईरहेको ग १ ख ९१०९ नम्बरको बस दुर्घटना हुँदा ४ जनाको घटनास्थलमै मृत्यु भएको छ भने बसमा सवार १० जना घाइते भएका छन्।
रुकुम पूर्वको भूमे गाउँपालिका ३ को क्याङसी बगरमा बस सडकबाट करिब ५० मिटर तल खसेको प्रहरीले जनाएको छ। दुर्घटनास्थलमा घाइतेहरुको उद्दार कार्य जारी रहेको प्रहरीले जनाएको छ।
त्यसैगरी, यसअघि मकवानपुरको भीमफेदीमा भएको बस दुर्घटनामा मृत्यु हुनेको संख्या ७ पुगेको प्रहरीले जनाएको छ।
काठमाडौंबाट हेटौंडा जाँदै गरेको बा ३ ख ७८५८ नम्बरको बस मकवानपुरको भीमफेदी गाउँपालिका जुरिखेतमा दुर्घटना हुँदा पाँच जनाको मृत्यु भएको छ।
भीमफेदीको आरोलोमा बस सडकबाट तल खस्दा बसमा सवार पाँच जनाको घटनास्थलमा नै मृत्यु भएको हो।
दुर्घटनास्थलमा अहिले उद्दार कार्य जारी रहेको छ भने, घाइतेहरुलाई उपचारका लागि अस्पताल लगिएको छ। घटनाको पूर्ण विवरण आइनसकेकोले मृत्युहुने र घाइतेहरुको संख्या बढ्न सक्ने अनुमान गरिएको छ।
EN
