काठमाडौँ- प्रधानमन्त्री केपी शर्मा ओली र चिनियाँ राष्ट्रपति सी जिनपिङले दुवै देशबीच आपसी हितमा आधारित सहकार्यलाई अघि बढाउने प्रतिबद्धता व्यक्त गरेका छन्। राष्ट्रपति सीले नेपाललाई निरन्तर सहयोग दिने र पहिले सहमति भएका उच्च गुणस्तरका बीआरआई परियोजनाहरू छिटो कार्यान्वयन गर्ने आश्वासन दिएका छन्।

प्रधानमन्त्री ओलीले नेपाल–चीन व्यापार, लगानी, कृषि, विज्ञान–प्रविधि, पर्यटन र जलवायु परिवर्तनजस्ता क्षेत्रहरूमा सहयोग विस्तारका लागि आग्रह गरेका थिए। उनले अवरुद्ध सीमा खोल्न र नेपाललाई भू–सञ्जालमा जोड्ने सहयोगको आवश्यकता पनि बताएका थिए।

वार्तामा राष्ट्रपति सीले बीआरआईमार्फत नेपाल–चीन जनताको नजिकिकरण र औद्योगिक, पूर्वाधार, ऊर्जा, शिक्षा, स्वास्थ्य तथा सुरक्षा क्षेत्रमा सहयोग प्रवर्द्धन गर्ने इच्छा व्यक्त गरेका छन्। दुवै नेताले रणनीतिक विश्वास बढाउँदै लाभदायक सहकार्यलाई थप सुदृढ गर्नेमा जोड दिएका छन्।