काठमाडौं – प्रधानमन्त्री केपी शर्मा ओलीका आर्थिक तथा विकास सल्लाहकार डा. युवराज खतिवडाले प्रधानमन्त्री ओली र चिनियाँ राष्ट्रपति सी चिनफिङबीचको दुई पक्षीय भेटवार्तामा चीनको ग्लोबल सेक्युरिटी इनिसियटिभ (जीएसआई) मा नेपालले समर्थन गरेको भन्ने दाबी गलत भएको स्पष्ट पारेका छन्।

सांघाई सहयोग संगठन (एससीओ) प्लस शिखर सम्मेलनका क्रममा भदौ १४ गते चीनको थियानजिनमा भएको भेटवार्ताबारे स्पष्ट गर्दै उनले नेपाल कुनै पनि मुलुकको सुरक्षा रणनीतिमा सहभागी नहुने बताए। खतिवडाका अनुसार नेपाल आफ्नो संविधान र असंलग्न परराष्ट्र नीतिप्रति प्रतिबद्ध छ।

उनले दुई देशबीच बेल्ट एण्ड रोड इनिसियटिभ (बिआरआइ) अन्तर्गत भएका सहमति कार्यान्वयनलाई प्राथमिकता दिने सहमति भएको र स्वास्थ्य, कृषि, व्यापार, पर्यटन, लगानी, पूर्वाधार, विज्ञान तथा प्रविधि लगायतका क्षेत्रमा सहकार्यबारे छलफल भएको जानकारी दिए।