१,४०१ जना नेपालीको शव नेपाल ल्याइयो

काठमाडौं – आर्थिक वर्ष २०८०/८१ मा वैदेशिक रोजगारीका क्रममा निधन भएका १,४०१ नेपालीको शव नेपाल ल्याएर परिवारलाई हस्तान्तरण गरिएको छ।

मृतकहरूमा सबैभन्दा धेरै २६ देखि ३० वर्ष उमेर समूहका २३३ जना थिए। त्यसपछि २१–२५ वर्ष उमेर समूहका १७२ जना, ३१–३५ वर्षका २२६ जना, ३६–४० वर्षका २२५ जना, ४१–४५ वर्षका २१५ जना, ४६–५० वर्षका ११७ जना र ५१–५५ वर्षका ७१ जना रहेका छन्।

२० वर्ष मुनिका २९ जना, ५६–६० वर्षका २४ जना, ६१–६५ र ६६–७० वर्ष उमेर समूहमा समान १२ जना र ७० वर्षभन्दा माथिका ६ जना नेपालीको पनि मृत्यु भएको उल्लेख गरिएको छ।

वैदेशिक रोजगार विभागका अनुसार १,४०१ शवमध्ये ४८१ जनाको शव विभागमार्फत प्रत्यक्ष रूपमा र १,०८६ जनाको अन्य माध्यमबाट नेपाल ल्याइएका हुन्।

त्यसैगरी विभागले मृत्यु भएका १,५१७ मृतक नेपाली आप्रवासी कामदारका परिवारलाई आर्थिक सहायता स्वरूप कुल १ अर्ब २ करोड रुपैयाँ प्रदान गरेको छ। सरकारले हाल प्रत्येक मृतक नेपाली आप्रवासी कामदारको परिवारलाई १० लाख रुपैयाँ क्षतिपूर्ति दिने व्यवस्था गरेको छ।