काठमाडौं – वैदेशिक रोजगारीका क्रममा विदेश गएका नेपालीहरूमध्ये पछिल्लो एक महिनामा मात्रै १७४ जनाको शव नेपाल ल्याइएको छ।

त्रिभुवन अन्तर्राष्ट्रिय विमानस्थल भन्सार कार्यालयको तथ्यांकअनुसार साउन महिनामा मात्र १७४ जनाको शव नेपाल ल्याइएको हो। सरदरमा हरेक दिन ४ देखि ५ जनासम्मको शव नेपाल आउने गरेको कार्यालयले जनाएको छ।

भन्सारका तथ्यांकअनुसार कुवेत, मलेसिया, साउदी अरेबिया, दक्षिण कोरिया, कतारलगायतका देशमा मृत्यु भएका नेपालीको शव ल्याइएको हो।

वैदेशिक रोजगार बोर्डका अनुसार आर्थिक वर्ष २०८१/८२ मा वैदेशिक रोजगारीमा गएका एक हजार २५५ जनाको मृत्यु भएको थियो। यो संख्या श्रम स्वीकृति लिएर वैदेशिक रोजगारीमा गएका र मृत्यु भएपछि बोर्डबाट आर्थिक सहायता प्राप्त गरेका परिवारको विवरणमा आधारित छ।

यस्तै प्रहरी तथ्यांकअनुसार अघिल्लो आर्थिक वर्ष २०८०/८१ मा १५१७ जना नेपालीको विदेशमा मृत्यु भएको थियो भने, सोही अवधिमा एक हजार ४०१ जनाको शव नेपाल ल्याइएको थियो।