काठमाडौँ- राजनीतिक असन्तुष्टि र भ्रष्टाचारविरुद्ध सुरु भएको युवाहरुको अनलाइन आक्रोश आज आन्दोलनको रुपमा सडकमा उत्रन लागेको छ। टिकटकमा भाइरल बनेको “नेपो किड” अभियानअन्तर्गत “जेन जी” ले आज काठमाडौंको माइतीघर, चितवन, पोखरा लगायत देशका विभिन्न शहरमा प्रदर्शन गर्ने तयारी गरेका छन्।त्यसो त काठमाडौँ जिल्ला प्रशासनले पनि उनीहरुलाई निश्चित क्षेत्र तोकेर प्रदर्शनको अनुमति दिएको छ।

जेन जी को प्रदर्शनमा अन्य व्यक्तिहरुको पनि घुसपैठ हुन सक्ने र प्रदर्शनले अर्कै रुप लिन सक्ने आंकलन पनि गरिएको छ। प्रहरीले आन्दोलनको स्वरुप अनुसार सुरक्षा व्यवस्था अगाडी बढाउने तयारि गरेको बुझिएको छ।

सत्ता र विशेषाधिकारमा आश्रित राजनीतिक परिवारको विलासी जीवनशैली र सामान्य युवाले रोजगारी र जीवन निर्वाहका लागि भोग्नुपर्ने कठिनाइबीचको ठूलो अन्तरलाई उजागर गर्ने उद्देश्यले यो आन्दोलन सुरु भएको हो। #PoliticiansNepoBabyNepal ह्यासट्याग अन्तर्गतका भिडियोहरूले यस अभियानलाई तीव्र बनाएका छन्।

आयोजकहरूका अनुसार आजको प्रदर्शनले राजनीतिक परिवारलाई होइन, तर उनीहरूलाई संरक्षण गर्ने विशेषाधिकारको संस्कृतिलाई प्रश्न गर्नेछ। उनीहरूका अनुसार जवाफदेहिता, समानता र भ्रष्टाचार अन्त्यको माग नै आन्दोलनको मुख्य उद्देश्य हो।

सरकारले सामाजिक सञ्जालमाथि नियन्त्रण र कडाइ गर्न थालेपछि “नेपो किड” अभियान अन्तर्गतको यो पहिलो राष्ट्रव्यापी प्रदर्शनले जेन जीको असन्तुष्टि अब डिजिटल सीमाभित्र मात्र नभई सडकमा पनि प्रकट भएको स्पष्ट गरेको छ।