काठमाडौं – सरकारले इम्बोस्ड नम्बर प्लेट अनिवार्य गर्ने निर्णयविरुद्ध ‘जाग नेपाली’ अभियानले आन्दोलन गर्ने घोषणा गरेको छ। अभियानका संयोजक डा. दीपेश केसीले यो कदम देवनागरी लिपि मेट्ने षड्यन्त्रअन्तर्गत भएको भन्दै कडा प्रतिरोध गर्ने बताए।

रिपोर्टर्स क्लब नेपालमा आइतबार पत्रकार सम्मेलन गरी जाग नेपालीले आन्दोलनका कार्यक्रम सार्वजनिक गरेको छ । कार्यक्रममा डा. केसीले देवनागरी हटाएर रोमन लिपि जबर्जस्ती थोपर्ने प्रयासलाई जनताले अस्वीकार गर्ने चेतावनी दिएका छन् ।

उनले विदेशी स्वार्थ र कमिशनको लोभमा नेपाली जनतालाई शोषण गर्दै मातृलिपि नामेट गर्ने प्रयास भइरहेको दाबी गर्दै यस्तो षड्यन्त्र परास्त गर्न सबैलाई प्रतिकारमा उत्रिन आह्वान गरेका छन् ।

डा. केसीले राष्ट्रघाती तत्वले धम्की र त्रास देखाएर रोमन लिपिको इम्बोस्ड नम्बर प्लेट थोपर्न खोजिरहेको आरोप लगाउँदै जनतालाई बहिष्कार गर्न र जडान नगर्न आग्रह गरेका छन् ।