गाजा- इजरायली प्रधानमन्त्री बेन्जामिन नेतान्याहुले हमासले युद्धविराम र बन्दी सम्झौतामा सहमति जनाए पनि इजरायलले गाजामा पूर्ण नियन्त्रण गर्ने बताएका छन्। उनको यो अभिव्यक्तिले इजरायलको लक्ष्य शान्ति नभई प्यालेस्टिनी भूमिमा कब्जा हो भन्ने स्पष्ट देखाएको छ।

नेतान्याहुको भनाइ इजरायली सेनाले गाजा सिटी कब्जा गर्ने पहिलो चरणको कारबाही सुरु गरेको घोषणापछि आएको हो। गाजा सिटीलाई आइडिएफ़ले हमासको गढको रूपमा व्याख्या गरेको छ। स्काई न्युज अष्ट्रेलियासँगको कुराकानीमा नेतान्याहुले भने, “हामीले यो गर्नैपर्छ, यसमा कुनै प्रश्न थिएन।”

उनले आफ्नो कठोर अडानलाई जायज ठहर्याउन अमेरिकी राष्ट्रपति डोनाल्ड ट्रम्पको भनाइ उद्धृत गर्दै हमासलाई जर्मनीका नाजीहरूसँग तुलना गरे। नेतान्याहुले युद्ध तुरुन्तै अन्त्य हुन सक्ने दाबी गर्दै हमासले आत्मसमर्पण, निशस्त्रीकरण र गाजाको सैन्यीकरण अन्त्य गर्नुपर्ने बताए। उनले विश्वव्यापी आलोचनालाई भने “यहूदी विरोध” भनेर खारेज गरेका छन् ।

तर मानवीय स्थिति दिनप्रतिदिन भयावह बन्दै गएको छ। संयुक्त राष्ट्र महासचिव एन्टोनियो गुटेरेसले फेरि तत्काल युद्धविरामको आह्वान गर्दै इजरायली आक्रमणले “ठूलो संख्यामा मृत्यु र विनाश” ल्याउने चेतावनी दिएका छन्। रेड क्रससहितका राहत संस्थाहरूले पनि कारबाही रोक्न आग्रह गरेका छन्। अक्टोबर २०२३ यता गाजामा प्यालेस्टिनीको मृत्यु संख्या ६२ हजार नाघिसकेको छ।