नियोर्क – इजरायली प्रधानमन्त्री बेन्जामिन नेतान्याहूले संयुक्त राष्ट्रसंघको महासभामा दिएको भाषणमा केही पश्चिमी मुलुकले फिलिस्तिनी राज्यलाई मान्यता दिएको कदमलाई कडा आलोचना गरेका छन्। उनले यसलाई “लाजको दाग” भन्दै यहुदीहरूको हत्या गर्दा फाइदा हुन्छ भन्ने सन्देश दिएको टिप्पणी गरे।

यधपी, नेतान्याहू बोल्न सुरु गर्दा धेरै जसो अधिकारी र कूटनीतिज्ञहरूले हल छाडेर गाजामा भएको इजरायली नरसंहारको विरोधमा उनको भाषण नै बहिष्कार गरे। संयुक्त राष्ट्रसंघको महासभाको हलमा उनको भाषण बहिष्कार गरेर उनि विश्व मंचमा एक्लिन पुगेका बेला बाहिर न्युयोर्कको टाइम्स स्क्वायरमा पनि गाजामा भइरहेको युद्धविरुद्ध प्रदर्शन चलिरह्यो।

हालै बेलायत, फ्रान्स, क्यानडा, अस्ट्रेलिया लगायतका मुलुकहरूले फिलिस्तिनी राज्यलाई मान्यता दिएका छन्। तर नेतान्याहूले फेरि पनि इजरायल कुनै पनि हालतमा फिलिस्तिनी राज्यलाई स्वीकार नगर्ने बताएका छन्। उनले यो नीतिलाई अधिकांश इजरायलीले समर्थन गर्ने दाबी गरे।

तर उनको शैलीलाई इजरायलमै पनि आलोचना गरिएको छ। विपक्षी नेता याएर लापिदले नेतान्याहूको भाषणलाई “थाकेको र गुनासो मात्र गर्ने” भनेर टिप्पणी गरे। इजरायल डेमोक्र्याट्स पार्टीका नेता याएर गोलानले यसलाई “बालसुलभ प्रचारबाजी” भनेका छन्।

सन् २०२३ को अक्टोबर ७ यता इजरायली आक्रमणमा कम्तीमा ६५ हजार ५४९ जना फिलिस्तिनी नागरिक मारिएका छन्।