वाशिंगटन- अमेरिकी राष्ट्रपति डोनाल्ड ट्रम्पले इजरायललाई कब्जामा रहेको गाजा पश्चिमी किनाराको विलय गर्न अनुमति नदिने बताएका छन्। उनले ओभल अफिसमा पत्रकारसँग कुरा गर्दै “यो सम्भव छैन” भनेका छन्।

ट्रम्पले गाजामा शान्ति सम्झौता “निकै नजिक” भएको दाबी गर्दै प्रधानमन्त्री बेन्जामिन नेतान्याहुसहित अन्य मध्यपूर्वी नेताहरूसँग छलफल गरेको जानकारी दिए।

यसैबीच, प्यालेस्टिन राष्ट्रपति महमुद अब्बासले संयुक्त राष्ट्रसभामा भिडियो सन्देशमार्फत फ्रान्सको समर्थनमा तयार भएको शान्ति योजनामा सहकार्य गर्न तयारी देखाएका छन्।

इजरायलमाथि अन्तर्राष्ट्रिय दबाब बढ्दो छ। बेलायत, जर्मनी र संयुक्त राष्ट्रसंघले गाजा पश्चिमी किनाराको विलयलाई अस्वीकार्य बताएका छन्। धेरै पश्चिमी मुलुकहरूले हालै स्वतन्त्र प्यालेस्टिन राज्यको मान्यता दिएका छन्।

अक्टोबर २०२३ देखि इजरायली आक्रमणमा ६५ हजारभन्दा बढी प्यालेस्टिन नागरिक मारिएका छन्, जसमा १८ हजारभन्दा बढी बालबालिका रहेको गाजा स्वास्थ्य मन्त्रालयले जनाएको छ। संयुक्त राष्ट्रसंघका अनुसार पाँच लाखभन्दा बढी मानिस भोकमरीको जोखिममा छन्।

इजरायलले नरसंहारको आरोप अस्वीकार गरे पनि उसमाथि अन्तराष्ट्रिय प्रतिबन्ध र व्यापार सीमित गर्ने प्रस्तावहरू बढिरहेका छन्।