EN
काठमाडौं – सहकारी ठगीको आरोपमा फरार रहेका जिबी राईलाई पक्राउ गर्न इन्टरपोलको सहयोग माग गर्दै डिफ्युजन नोटिस जारी गरिएको छ ।
जिल्ला प्रहरी कार्यालय कास्कीले यसअघि सूर्यदर्शन सहकारीमा भएको ठगी मुद्दामा डिफ्युजन नोटिस जारी गर्न प्रहरी प्रधान कार्यालयलाई अनुरोध गरेको थियो । जवाफमा इन्टरपोलको राष्ट्रिय केन्द्रीय ब्यूरो काठमाडौंले सूचना जारी गर्न इन्टरपोलका महासचिवलाई अनुरोध गरेको केन्द्रीय प्रहरी प्रवक्ता डीआईजी भीमप्रसाद ढकालले जानकारी दिए ।
सहकारीका निक्षेपकर्ताको रकम हिनामिना गरेको अभियोगमा कास्की जिल्ला अदालतले कोषाध्यक्ष कुमार रामटेललाई थुनामा राख्न आदेश दिएको थियो । सोही घटनामा उपाध्यक्ष कैलाशकुमार दरलामी, सदस्य शिवबहादुर गुरुङ र भागीश्वर अर्याललाई पनि पक्राउ गरी हाल हिरासतमा राखेर अनुसन्धान भइरहेको कास्की प्रहरीले जनाएको छ ।
सूर्यदर्शन सहकारी ठगी मुद्दामा जिबी राईसहित १९ जनाविरुद्ध पक्राउ पूर्जी जारी भएको छ । तीमध्ये १५ जना अहिले फरार छन्।
उजुरीमा सूर्यदर्शनका कर्मचारीले निक्षेपकर्ताको १ अर्ब १२ करोड रुपैयाँ हिनामिना गरेको आरोप छ । सहकारी ऐन अन्तर्गत उनीहरुलाई ८ देखि १० वर्षसम्म जेल सजाय र जरिवाना हुनसक्नेछ ।
जिबी राई समूहले नक्कली शेयरधनी र विभिन्न कम्पनी बनाएर सूर्यदर्शनको रकम हिनामिना गरेको प्रहरीको प्रतिवेदनले देखाएको छ । सहकारीका सञ्चालक तथा पदाधिकारीले नक्कली शेयर सदस्य खाता खोलेर सहकारी वा व्यक्तिको नाममा सम्पत्ति नराखी रकम दुरुपयोग गरेको प्रहरीको निष्कर्ष छ ।
