वार्सा -पोल्याण्डका प्रधानमन्त्री डोनाल्ड टुस्कले युक्रेनमा जारी युद्ध केवल युक्रेनको मात्र नभई पश्चिमाको पनि युद्ध भएको बताएका छन्। वार्सा सुरक्षा फोरममा बोल्दै उनले युरोपियन युनियनका नेताहरूको सबैभन्दा ठूलो र महत्वपूर्ण काम भनेको आफ्नो समाजलाई रुसबाट आउने खतराबारे सचेत गराउनु रहेको बताए।

उनले भने, “आज युरोपेली नेताहरूको सबैभन्दा ठूलो र महत्त्वपूर्ण काम भनेको पश्चिमी समाजलाई बुझाउनु हो कि युक्रेन युद्ध यो शताब्दीमा उनीहरूले सामना गरेको सबैभन्दा गम्भीर चुनौती हो।” उनले चेतावनी दिँदै भने कि युक्रेन पराजित भए यसको असर पोल्याण्डदेखि संयुक्त राज्य अमेरिका सम्म सम्पूर्ण पश्चिमी सभ्यतामा पर्छ। टुस्कले ईयू र नेटोमा एकता र ऐक्यबद्धताको आवश्यकता औंल्याउँदै रूसलाई पराजित गर्न त्यो अपरिहार्य भएको बताए।

प्रधानमन्त्री टुस्कले पोलिस सेनाको व्यापक आधुनिकीकरणको योजना प्रस्तुत गर्दै ईयुभित्रका सरकार र समाज दुवैलाई युद्धको तयारीका लागि जुट्न आग्रह गरे। यसअघि वार्साले रुसमाथि आफ्नो हवाई क्षेत्रमा ड्रोन पठाएको आरोप लगाएको थियो तर मस्कोले यसलाई अस्वीकार गरेको छ।

यसैबीच, रुसले युक्रेन युद्धलाई पश्चिमाले चलाएको प्रोक्सी युद्ध भनेको छ। केही दिनअघि मात्र रूसी परराष्ट्रमन्त्री सर्गेई लाभरोभले ईयू र नेटोले नै संकट भड्काएको र रुसविरुद्ध युद्ध छेडेको दाबी गरेका थिए।

गत शनिबार संयुक्त राष्ट्रसंघको महासभामा बोल्दै लाभरोभले रुस निकट भविष्यमै नेटोमाथि आक्रमण गर्ने योजनामा रहेको भन्ने पश्चिमी दाबीलाई खारेज गर्दै भने, “रुसको त्यस्तो कुनै पनि इरादा छैन।” उनले भने, कि मस्कोले पटक–पटक युरोपमा कानूनी रूपमा बाध्यकारी सुरक्षा ग्यारेन्टीको प्रस्ताव राखे पनि नेटो सदस्य राष्ट्रहरूले त्यसलाई बेवास्ता गरेको बताए।