स्वास्थ्य तथा जनसङ्ख्या मन्त्रालयले गत वर्ष डिसेम्बरमा म्याद सकिएको सिनोभ्याक–कोरोनाभ्याक कोभिड–१९ भ्याक्सिनको ४० लाख डोज डिस्पोज गर्न भ्याक्सिन विज्ञहरूसँग परामर्श सुरु गरेको अधिकारीहरूले बताएका छन् ।

उक्त भ्याक्सिन दुई वर्षअघि चीनले सहयोग स्वरुप प्रदान गरेको थियो। चीनले उक्त भ्याक्सिन सहयोगको रुपमा पठाउँदा नेपालमा अन्य भ्याक्सिनहरु पनि उपलब्ध भैसकेको साथै खोपको पहिलो मात्रा र बुष्टर डोज लगाउने नेपालीको संख्या पनि कम भैसकेकोले उक्त भ्याक्सिन प्रयोगमा नआउँदा भ्याक्सिनको म्याद सकिएको बताइएको छ।

स्वास्थ्य मन्त्रालयका प्रवक्ता डा प्रकाश बुढाथोकीले कोरोनाविरुद्धको खोपको ४० लाख डोज डिस्पोजका लागि विज्ञको सल्लाह लिन थालेको बताएका छन् । “हामीले विश्व स्वास्थ्य संगठनका विज्ञहरू, देश भित्रका खोप विशेषज्ञहरू र राष्ट्रिय खोप सल्लाहकार समितिसँग भ्याक्सिनको डोज डिस्पोज गर्ने लागत-प्रभावी र सजिलो तरिकाहरू बारे परामर्श गरिसकेका छौं।”अधिकारीहरूले खोपको डोजको डिस्पोजलका लागि चीनका भ्याक्सिन उत्पादन गर्ने कम्पनीहरूका विज्ञहरूसँग पनि सल्लाह लिएको बताएका छन्।

नेपालले एस्ट्राजेनेका, भेरो सेल, फाइजर-बायोटेक, र मोडर्ना जस्ता ब्रान्डहरू सहित चीन, भारत, जापान, युरोप र संयुक्त राज्य अमेरिकाका धेरै देशहरूमा निर्मित कोरोनाभाइरस खोपहरू प्रयोग गरेको थियो।