गाजा – इजरायलले गाजा सहरका “युद्ध क्षेत्र” भनिएका इलाकाबाट प्यालेस्टिनीहरूलाई जबर्जस्ती दक्षिण गाजातर्फ सार्ने तयारी गरेको छ। यो कदम गाजाको सबैभन्दा ठूलो शहरी केन्द्र कब्जा गर्ने नयाँ आक्रमण सुरु भएको केही दिनमै आएको हो।

इजरायली सेनाका प्रवक्ता अविचाय अद्राईका अनुसार प्रभावित परिवारलाई केरम शालोम नाकाबाट संयुक्त राष्ट्रसंघ र सहायताप्रदायी संस्थाहरूको सहयोगमा स्थानान्तरण गरिने बताएको छ। तर, संयुक्त राष्ट्रसंघले यसबारे आफ्नो संलग्नता पुष्टि गरेको छैन।

प्रधानमन्त्री नेतान्याहूले गाजा सहर र अल–मावासीमा रहेका हमासका गढ नष्ट गर्ने आदेश दिएपछि यो योजना अगाडि बढाइएको हो। संयुक्त राष्ट्रसंघले भने यस कदमले पहिले नै गम्भीर मानवीय संकट भोगिरहेका हजारौँ परिवारलाई थप जोखिममा पार्ने चेतावनी दिएको छ।

इस्लामिक जिहादले यसलाई इजरायलको “निर्दयी आक्रमण” को हिस्सा भन्दै अन्तर्राष्ट्रिय कानुनको ठाडो उल्लङ्घन भनेको छ।

यसबीच, इजरायली सेनाले गाजा सहर वरिपरिको कारबाही तीव्र पारेको छ। जेतुन र शुजैया क्षेत्रमा भीषण हवाई आक्रमण भएको छ भने जेतुनको अस्काउला क्षेत्रमा भएको ड्रोन आक्रमणमा केही मानिसको मृत्यु र अरु घाइते भएको फिलिस्तिनी सञ्चारमाध्यमले जनाएका छन्।