रुसको सिमानातर्फ नाटोले आफ्नो सैन्य पूर्वाधार विस्तार गर्दै लगेमा रुसले त्यसको समानान्तर प्रतिक्रिया दिने क्रेमलिनका प्रवक्ता दिमित्री पेस्कोभले बताएका छन्। गत हप्ता युरोपमा सुरु भएको नाटोको स्ट्याडफास्ट डिफेन्डर सैन्य अभ्यास २०२४ लाई लक्षित गर्दै पेस्कोभले उक्त अभ्यास रुसको राष्ट्रिय सुरक्षाका लागि खतरा रहेको समेत बताएका छन्।

नाटोको उक्त सैन्य अभ्यास दशक यताकै सबैभन्दा ठूलो सैन्य अभ्यास भएको बताइएको छ। उक्त अभ्यासमा सबै ३१ सदस्य राष्ट्रहरूका ९०००० सेनाहरू समावेश छन् र उक्त अभ्यासमा स्वीडेन पनि सहभागी रहेको छ। उक्त अभ्यास मे महिनासम्म चल्ने बताइएको छ। अभ्यासमा १ सय ३३ ट्याङ्क र ५३३ पैदल सेनाका लडाकु सवारी साधनका साथै ५० भन्दा बढी नौसैनिक जहाज र ८० वटा हेलिकप्टर, ड्रोन र लडाकु विमानहरू सहभागी रहेको बताइएको छ ।

पेस्कोभले नाटो सधैं वाशिंगटन द्वारा नियन्त्रित “टकराव को साधन” को रूप मा अभिप्रेत रहेको र अमेरिकाले उक्त साधनलाई आफ्नो स्वार्थ पुरा गर्न हरसम्भव तरिकाले प्रयोग गर्न सक्ने समेत बताएका छन्।

आगामी केही दशकहरूमा युरोपमा आक्रमण गर्ने रुसको योजना रहेको भन्दै, बेलायत, जर्मनी र इस्टोनिया लगायतका सदस्य राष्ट्रहरूका अधिकारीहरूले निकट भविष्यमा रुससँग पूर्ण मात्रामा सैन्य भिडन्तको लागि तयार हुन ब्लकलाई आग्रह गरिरहेका छन्।

यधपी, रुसले ति सबै तर्कहरुलाई कडाइका साथ अस्वीकार गर्दै नाटोले फैलाएको हल्ला मात्र भएको बताएको छ । रुसी राष्ट्रपति भ्लादिमिर पुटिनले मस्कोको “भूराजनीतिक, आर्थिक वा सैन्य रूपमा … नाटो विरुद्ध युद्ध लड्न कुनै चासो छैन” र यसको सट्टा अमेरिकाको नेतृत्वमा रहेको ब्लकसँग सम्बन्ध विकास गर्न रुचाउने कुरामा जोड दिएका छन्।