मस्को- रूसले विकास गरेको नयाँ क्यान्सर खोपले तीन वर्षको प्रारम्भिक परीक्षणमा उत्साहजनक नतिजा देखाएको छ र अब क्लिनिकल प्रयोगका लागि स्वीकृतिको प्रतीक्षामा छ।

संघीय जैव–चिकित्सा एजेन्सीकी प्रमुख भेरोनिका स्क्भोर्त्सोभाका अनुसार यो खोप सुरक्षित र अत्यन्तै प्रभावकारी प्रमाणित भएको छ। परीक्षणमा ट्युमरको आकार घट्ने, वृद्धि ढिलो हुने र बिरामीको जीवन दरमा सुधार हुने देखिएको छ। केही प्रकारका क्यान्सरमा यसको प्रभावकारिता ६० देखि ८० प्रतिशतसम्म पुगेको बताइएको छ।

उनका अनुसार स्वास्थ्य मन्त्रालयमा आवश्यक कागजात बुझाइसकिएको छ र प्रारम्भिक रुपमा यो खोप कोलोरेक्टल क्यान्सरका लागि प्रयोगमा ल्याइनेछ। पछि ग्लिओब्लास्टोमा र मेलानोमा क्यान्सरका लागि पनि उपलब्ध गराइनेछ।

यो खोप गामालेया अनुसन्धान संस्थाले विकास गरेको हो। एमआरएनए प्रविधिमा आधारित खोपले कृत्रिम बुद्धिमत्ताको प्रयोगमार्फत बिरामीको प्रतिरक्षा प्रणालीलाई क्यान्सर कोषिका विरुद्ध लड्न सिकाउँछ। यही संस्थाले अघिल्लो स्पुतनिक भी कोभिड–१९ खोप विकास गरेको थियो र अहिले सोही प्रविधि प्रयोग गरेर एचआईभी खोप पनि विकास गरिरहेको छ।