रुसले कृत्रिम बुद्धिमत्ता (AI) प्रयोग गरेर विकास गरिएको व्यक्तिगत क्यान्सर खोपको परीक्षण केही महिनाभित्र सुरु गर्ने तयारी गरेको छ। गामालेया अनुसन्धान केन्द्रका निर्देशक अलेक्जेन्डर गिन्ट्सबर्गका अनुसार यो mRNA-आधारित खोप बिरामीको अनुवांशिक डाटाका आधारमा विशेष रूपमा तयार गरिन्छ।

यो खोप सुरुवातमा मेलानोमा (छाला क्यान्सर) का बिरामीहरूमा परीक्षण गरिनेछ। गामालेया केन्द्रले खोप उत्पादन गर्नेछ भने परीक्षण कार्य मस्कोस्थित हर्टसेन अनुसन्धान केन्द्र र ब्लोखिन क्यान्सर सेन्टरले गर्नेछन्।

खोप बिरामीको शरीरमा ट्युमरसम्बन्धी प्रोटिन चिन्न सिकाएर क्यान्सर सेलहरू नष्ट गर्न प्रतिरक्षा प्रणालीलाई तालिम दिनेगरी बनाइएको हो।

अनुकूलित प्रकृतिका कारण यो खोपलाई रुस सरकारले हालै लागू गरेको नयाँ नियमअन्तर्गत परीक्षण गरिनेछ। प्रारम्भिक जनावर परीक्षण र केही मानव परीक्षणमा उत्साहजनक परिणाम देखिएको जनाइएको छ।

यदि प्रभावकारी सावित भयो भने यो खोपले रुसको सार्वजनिक स्वास्थ्य रणनीतिमा ठूलो फड्को मार्न सक्छ। यसप्रति विदेशी चिकित्सा संस्थाहरूले पनि चासो देखाएका छन्।