चुनाव हारेका व्यक्तिहरूको जमात खडा गरेर पार्टीविरुद्ध लागेको आरोप

काठमाडौं : प्रधानमन्त्री तथा नेकपा एमाले अध्यक्ष केपी शर्मा ओलीले पूर्वराष्ट्रपति विद्यादेवी भण्डारीको पार्टी सदस्यता नवीकरण नहुने बताएका छन्।

शुक्रबार च्यासलमा आयोजित पार्टी प्रवेश कार्यक्रममा ओलीले भण्डारी राष्ट्रपति हुन पार्टी सदस्यता परित्याग गरेकाले अब त्यो नवीकरण नहुने स्पष्ट पारे। आफूले सदस्यता खोसेको भन्ने आरोप असत्य भएको उनले दोहोर्याए। भण्डारीले रसिद काटेको दाबीबारे ओलीले कर्मचारीलाई झुक्याएर रसिद काट्दैमा सदस्यता नवीकरण नहुने टिप्पणी गरे।

उनका अनुसार, भण्डारीले चुनाव हारेका र पार्टीप्रति असन्तुष्ट व्यक्तिहरूलाई भेला गरेर जमात खडा गर्न थालेकी छन्। उनले दुई पटक राष्ट्रपति भइसकेको व्यक्तिले पार्टीभित्र समस्या सिर्जना गर्नु कल्पनातीत भएको बताए। साथै, मदन भण्डारीको जन्मदिन मनाउने नाममा पार्टीविरुद्ध भेला गर्ने काम भइरहेको भन्दै असन्तुष्टहरूलाई बोकेर हिँड्ने गरेको आरोप लगाए।

ओलीले भने, “पार्टीका सधैंका असन्तुष्ट, पार्टीका पक्षमा कहिल्यै नबोल्ने, विभिन्न संगठनका चुनावमा हार्नेहरूलाई भेला गरेर असन्तुष्टहरूको जमात खडा गर्न लाग्नु भएको छ।”