काठमाडौँ — नेपाली नागरिकलाई नक्कली कागजातमार्फत भुटानी शरणार्थी बनाएर अमेरिका पठाउने प्रकरणमा संलग्न भनिएका पूर्वगृहमन्त्रीसहित उच्च पदाधिकारीविरुद्ध दायर मुद्दाको अन्तिम सुनुवाइ आजदेखि जिल्ला अदालत काठमाडौंमा सुरु भएको छ।

यो प्रकरणमा किर्ते, ठगी, संगठित अपराध र राज्यविरुद्धको अपराधलगायत पाँच अभियोगमा मुद्दा दायर भएको थियो । करिब साढे दुई वर्षपछि अदालतले निरन्तर सुनुवाइ गरेर अन्तिम टुंगोमा पुर्‍याउने तयारी गरेको हो ।जिल्ला अदालतका सूचना अधिकारी दीपककुमार श्रेष्ठका अनुसार अब निरन्तर सुनुवाइ गरेर मुद्दालाई अन्तिम किनारा लगाइनेछ।

२०७८ जेठ १० मा दायर मुद्दामा पूर्व उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँण, तत्कालीन गृहसचिव टेकनारायण पाण्डे, पूर्व सांसद आङटावा शेर्पा, पूर्वगृहमन्त्री रामबहादुर थापाका सल्लाहकार इन्द्रजित राईसहित ३० जनाविरुद्ध मुद्दा दायर गरिएको थियो। पछि थप आरोपपत्रमार्फत केशव दुलाल, बेचन झा लगायत अन्य व्यक्तिलाई समेत प्रतिवादी बनाइएको थियो।

अदालतले यसअघि केही अभियुक्तलाई धरौटीमा रिहा गरेको छ भने धेरैजना अझै थुनामै छन्। केही फरार अभियुक्तलाई पक्राउ गरिएको भए पनि अझै केही पक्राउ हुन बाँकी छन्।