काठमाडौं – लगातार वर्षाका कारण पूर्वी पहाडी जिल्लाका धेरै जलविधुत आयोजना बाढी र पहिरोको असरमा परेका छन्। स्वतन्त्र ऊर्जा उत्पादकहरूको संस्था (इप्पान) नेपालका अनुसार हालसम्म १८ वटा साना तथा ठूला जलविधुत आयोजना क्षतिग्रस्त भएका छन्।

इप्पानले दिएको प्रारम्भिक विवरणअनुसार १०५.४ मेगावाट क्षमताका १३ सञ्चालनमा रहेका आयोजना बन्द भएका छन् भने ९३ मेगावाट क्षमताका ५ निर्माणाधीन आयोजना बाढीले क्षतिग्रस्त बनाएको छ।

इलाम जिल्लामा रहेका ४.५ मेगावाट र २२ मेगावाटका माइखोला, ८ र ७ मेगावाटका माइखोला क्यासकेड, ७.८ मेगावाट र ९.६ मेगावाटका सुपरमाई र सुपरमाई ए, र ३ मेगावाटको सुपरमाई ए क्यासकेड आयोजना उत्पादन बन्द भएका प्रमुख प्रभावित आयोजना हुन्। त्यसैगरी जोगमाई, जोगमाई क्यासकेड, तल्लो जोगमाई, माइबेनी, माथिल्लो माई खोला र माइसी क्यासकेड समेत बन्द भएका छन्।

यस्तै, निर्माणाधीन अवस्थामा रहेका पाँचथर, इलाम र सिन्धुपाल्चोकका पाँच आयोजना पनि क्षतिग्रस्त भएका छन्। पाँचथरको सभाखोला बी, हेवाखोला, सिद्धिखोला, ब्रह्मायणी र अपर ब्रह्मायणी आयोजना बाढी तथा पहिरोले प्रभावित भएको इप्पानले जनाएको छ।