कन्जरभेटिभ पार्टीका नेता ऋषि सुनक बेलायतको प्रधानमन्त्री बनेका छन्। उनि क्रिष्टियन राष्ट्र बेलायतको पहिलो हिन्दु प्रधानमन्त्री बनेका छन्।

४२ वर्षीय सुनक राजा चार्ल्सद्वारा नियुक्त हुने पहिलो प्रधानमन्त्री हुन् । सुनकलाई मंगलबार बेलायती राजा चार्ल्सले देशको प्रधानमन्त्री नियुक्त गरेका हुन्।

आफ्नो असफल आर्थिक नीति र सत्तारुढ कन्जरभेटिभ पार्टीमा आफ्ना सहकर्मीहरूबीचको बढ्दो असन्तुष्टिको पृष्ठभूमिमा अक्टोबर २० मा आफ्नो राजीनामाको घोषणा गर्ने लिज ट्रसको स्थान लिएका सुनक यस अघिको प्रधानमन्त्रीको दौडमा पार्टीभित्रको आन्तरिक प्रतिस्पर्धामा ट्रससँग पराजित बनेका थिए।

कन्जरभेटिभ पार्टीको दुवै प्रतिद्वन्द्वी पूर्वप्रधानमन्त्री बोरिस जोन्सन र हाउस अफ कमन्सका नेता पेनी मोर्डाउन्ट प्रधानमन्त्रीको दौडबाट पछि हटेपछिकन्सर्भेटिभ पार्टीबाट सुनक प्रधानमन्त्रीको एकल दाबेदार बनेका हुन् ।

सुनक तेस्रो पुस्ताका आप्रवासी हुन् जसको परिवार सन् १९६० को दशकमा केन्या र बेलायती तान्गानिका (आधुनिक तान्जानिया)बाट बेलायतको साउथह्याम्प्टनमा सरेका थिए।