काठमाडौं महानगरपालिका र सिसडोल तथा बन्चरे डाँडाका स्थानीयबीच शुक्रबार मध्यराति फोहोर व्यवस्थापन सम्बन्धि विषयमा १८ बुंदे सहमति भएको छ।

गएराती भएको सहमति लगत्तै उपत्यकाको फोहोर उठ्ने भएको छ।
ल्यान्डफिल साइट प्रभावित क्षेत्रका जनप्रतिनिधि र महानगरबीचको सहमतिअनुसार आगामी दिनबाट फोहोर ढुवानी रातिको समयमा मात्र हुनेछ । स्थानीयवासीका लागि महानगरले प्रभावित स्थानीयलाई क्षतिपुर्ती दिनुपर्ने, नियमित बजेट छुट्टाउनुपर्ने देखि पूर्वाधार निर्माणसम्मको सहमति भएको छ ।

महानगरपालिका र स्थानीय बासिन्दाबीच भएको सहमति अनुसार तीन महिनाभित्र ल्यान्डफिल साइट पुग्ने सडक खण्डको निर्माण तथा आवश्यक बत्ती लगायतका पूर्वाधार निर्माण गरिने जनाइएको छ।

नुवाकोटको बञ्चरेडाँडामा काठमाडौं उपत्यकाको फोहोर फ्याँक्ने विषयलाई लिएर स्थानीय बासिन्दाले अवरोध गरेपछि स्थिति तनावग्रस्त बनेको छ ।

उपत्यकाको फोहोर सिस्डोल र बञ्चरेडाँडामा फाल्ने विषयमा विभिन्न मागहरु सम्बोधन गर्नेगरी काठमाडौँमा सहमति भएपनि स्थानीय बासिन्दाले अवरोध गरेपछि मंगलबारबाट प्रहरीको सहयोगमा फोहोर व्यवस्थापन सुरु गरिएको थियो। तर बुधबार पनि स्थानीयले अवरोध गरेपछि प्रहरी र स्थानिय बासिन्दाबीच झडपको स्थिति सिर्जना भएको हो।
स्थितिलाई नियन्त्रणमा लिन प्रहरीले अश्रुग्यास प्रयोग गरेको छ।