काठमाडौं – स्वास्थ्य बिमा बोर्डले समयमा बिमा नवीकरण नगर्नेहरूका लागि थप शुल्क लिने निर्णय गरेको छ। बोर्डले बुधबार जारी गरेको सूचनामा आगामी असोज ३१ गतेसम्म बिमा नवीकरण नगरेमा विलम्ब शुल्क तिर्नुपर्ने उल्लेख छ।

बोर्डका अनुसार तीन वर्षसम्म बिमा नवीकरण नगर्नेले योगदान रकमको चार गुणा बराबर शुल्क तिर्नुपर्नेछ।

सूचनामा भनिएको छ, “बिगतमा स्वास्थ्य बिमा गरी नवीकरण नगरेका बिमित परिवारलाई एक पटकको लागि विलम्ब शुल्कमुक्ति दिइनेछ। तर आगामी कात्तिक ३१ गतेपछि नवीकरण गर्नेले विलम्ब शुल्क तिर्नुपर्नेछ।”

असोज मसान्तसम्म नवीकरण गर्नेहरूलाई पुरानो योगदान रकममै नवीकरणको सुविधा दिइनेछ, कुनै अतिरिक्त शुल्क लाग्ने छैन।

सूचनामा थप विवरण अनुसार:

बिमा म्याद सकिएको ३ महिनाभित्र नवीकरण गरेमा १० प्रतिशत अतिरिक्त शुल्क लाग्नेछ।

६ महिनाभित्र नवीकरण गरेमा ३० प्रतिशत शुल्क लाग्नेछ।

६ महिनादेखि १ वर्षभित्र नवीकरण गरेमा ५० प्रतिशत शुल्क लाग्नेछ।

१ वर्षपछि नवीकरण गरेमा योगदान रकमको १०० प्रतिशत अतिरिक्त शुल्क लाग्नेछ।

दुई वर्षसम्म नवीकरण नगरेकोले योगदान रकमको तीन गुणा बराबर शुल्क तिर्नुपर्नेछ।

तीन वर्षभन्दा बढी नवीकरण नगरेमा योगदान रकमको तीन गुणा बराबर अतिरिक्त शुल्क लाग्नेछ।

बोर्डले समयमै स्वास्थ्य बिमा नवीकरण गरी अनावश्यक शुल्कबाट बच्न सबै बिमित परिवारलाई सचेत रहन आग्रह गरेको छ।