काठमाडौं – ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले राष्ट्रिय गौरवका सुनकोशी–मरिन र भेरी–बबई बहुउद्देश्यीय आयोजनाको ठेक्का यथास्थितिमा राख्नुको औचित्य नभएको बताउनुभएको छ।

मंगलबार मन्त्रालयमा सचिव, सिँचाइ विभागका महानिर्देशक, आयोजनाका प्रमुख, परामर्शदाता र निर्माण व्यवसायीसँग छलफल गर्दै मन्त्री घिसिङले अस्वाभाविक ढिलाइका कारण ठेक्का तोडी नयाँ ढंगले अघि बढ्नैपर्ने निष्कर्ष निकालेका हुन् ।

उनले तराई क्षेत्रमा सिँचाइ पुर्‍याएर कृषि उत्पादन बढाउने उद्देश्यले सुरु गरिएका आयोजनामा ढिलाइ हुँदा मुलुकले ठूलो प्रतिफल गुमाइरहेको बताए। समयमै काम सक्नुपर्नेमा निर्माण व्यवसायीले बहाना बनाइरहेका र अर्बौँ लगानी भएको उक्त क्षेत्रको ब्याज मात्रै अर्बौँ पुगेको भन्दै उक्त अवस्थामा म्याद मात्र थप्नुको अर्थ नभएको उनले बताएका छन्।

भेरी–बबई आयोजनामा २०७७ भदौमै सुरुङ निर्माण सम्पन्न भए पनि बाँध र विधुत गृह भने अझै बनेका छैनन्। उक्त आयोजनामा २०७६ साउनमा गङ्दोङ युतियान–रमण जेभीसँग सम्झौता भएको थियो र हालसम्म भौतिक प्रगति ५७ प्रतिशतमा सीमित छ।

त्यसैगरी सुनकोशी–मरिन आयोजनामा सुरुङ तयार भए पनि बाँध र विधुत गृह लगायतका संरचनाको प्रगति १० प्रतिशत मात्रै छ। ठेक्का अवधिको करिब ६० प्रतिशत समय बितिसक्दा पनि निर्माण अघि नबढेकाले मन्त्री घिसिङले सबै ठेक्का तोडी नयाँ ढंगले अगाडि बढाउनुपर्ने बताएका छन्।