काठमाडौं – नक्कली भुटानी शरणार्थी प्रकरणमा पुर्पक्षका लागि कारागारमा रहेका टोपबहादुर रायमाझी “जेन जी” प्रदर्शन चर्किएर कारागारमा सुरु भएको आगजनी र तोडफोड पछि कारागार छोडेर भागेका भएपनि अहिले आएर उनले आफु कारागार फर्कन तयार रहेको बताएका छन् ।

कारागार प्रशासन स्रोतकाअनुसार रायमाझीले टेलिफोन सम्पर्क गरी आफू कुनै पनि कारागार फर्कन तयार रहेको बताएका हुन् । रायमाझीले नै आफू आउन तयार रहेको बताए पनि अहिले नआउन भनिएको कारागार स्रोतले बताएको छ ।

ठीक छ हाम्रै सम्पर्कमा रहनु होला । परिस्थिति सबै मिलेपछि खबर गर्छौं भनेको कारागार प्रशासनले बताएको छ। सुन्धारास्थित केन्द्रीय कारागारमा रायमाझी ३८ सय अन्य कैदीबन्दी सहित कारागारमा थिए ।

सोहि कारागारमा रहेका सुन काण्डमा मुख्य नाइके चुडामणि उप्रेती भनिने गोरे पनि फरार भएका छन् ।सुन्धारा कारागारबाट करिब ३३ सय कैदीबन्दी फरार भएका छन्।

फरार भएका मध्ये केही कैदीबन्दी भने कारागार फर्किसकेका छन् भने केही फर्कने क्रममा रहेको बताइएको छ । भुटानी शरणार्थी काण्डमै कारागारमा रहेका पूर्वसचिव टेकनारायण पाण्डेले पनि आफू कारागार फर्कन तयार रहेको सन्देश पठाएको कारागार प्रशासनले बताएको छ ।