काठमाडौं – राष्ट्रपति रामचन्द्र पौडेलले सविता भण्डारी बराललाई महान्यायाधिवक्ता नियुक्त गरेका छन्। प्रधानमन्त्री सुशीला कार्कीको सिफारिसमा संविधानको धारा १५७(२) बमोजिम भण्डारीलाई नियुक्त गरिएको राष्ट्रपति कार्यालयले जनाएको छ।

वरिष्ठ अधिवक्ता भण्डारी नेपालको पहिलो महिला महान्यायाधिवक्ता बनेकी छिन्। यसअघि केपी शर्मा ओली नेतृत्वको सरकार ढलेपछि तत्कालीन महान्यायाधिवक्ता रमेश बडालले आइतबार राजीनामा दिएका थिए।

बडालको राजीनामापछि प्रधानमन्त्री कार्कीले भण्डारीलाई महान्यायाधिवक्ता बनाउने निर्णय गरेकी हुन्। जेनजी अभियन्ताहरूको प्रस्तावमा कार्की प्रधानमन्त्री बनेकी थिइन्। राष्ट्रपति पौडेलले ६ महिनाभित्र निर्वाचन गराउने शर्तमा उनलाई प्रधानमन्त्री नियुक्त गरेका हुन्। अन्तरिम सरकारले फागुन २१ गते चुनावको मिति तोकेको छ।