संयुक्त राष्ट्रसंघ — रुसका परराष्ट्रमन्त्री सेर्गेई लावरोभले शनिबार संयुक्त राष्ट्र महासभामा सम्बोधन गर्दै आफ्नो देशले नाटो वा युरोपियन युनियन सदस्य मुलुकमाथि आक्रमण गर्ने कुनै योजना नभएको बताएका छन्। तर, रुसमाथि कुनै पनि प्रकारको आक्रमण वा आक्रामक कदम चालिए कडा र निर्णायक जवाफ दिने चेतावनी पनि दिएका छन् ।

लावरोभले हालका वर्षहरूमा पश्चिमी मुलुकहरूले रुसलाई लक्षित गर्दै धम्की र आरोपहरू बढाउँदै लगेको बताए। उनका अनुसार रुसलाई नाटो वा युरोपेली संघमाथि हमला गर्ने योजनामा संलग्न भएको भनेर गरिएको प्रचार पूर्ण रूपमा भ्रम फैलाउने काम मात्र हो। उनले राष्ट्रपती भ्लादिमिर पुटिनले पटक–पटक यस्तो आरोप खण्डन गर्दै आएको समेत बताएका छन्।

उनले मध्यपूर्वमा भइरहेको द्वन्द्वतर्फ ध्यानाकर्षण गराउँदै गाजामा इजरायलले गरेको आक्रमणको कडा आलोचना समेत गरे। उनले सन् २०२३ को अक्टोबर ७ मा हमासले इजरायलमाथि गरेको आक्रमणको निन्दा गर्ने तर गाजामा हजारौं निर्दोष नागरिकको हत्या गर्ने कार्य कुनै हालतमा औचित्यपूर्ण नहुने बताए।

इरानबारे बोल्दै लावरोभले पछिल्लो समय रूस र चीनको पहलमा गरिएको प्रतिबन्ध राहत थप्ने प्रयास असफल भएकोमा खेद प्रकट गरे। उनले पश्चिमी मुलुकहरूले इरानविरुद्ध प्रतिबन्ध पुनः लागू गर्ने निर्णयलाई “अवैध र एकतर्फी कदम” भनेका छन्। उनका अनुसार यस्तो कदमले कूटनीतिक समाधान खोज्ने प्रयासलाई नै नोक्सान पुर्‍याएको छ।

युरोपमा हालै भएका ड्रोन आक्रमण, हवाई क्षेत्रमा देखिएका अनधिकृत गतिविधिहरूको पनि उनले उल्लेख गरे। डेन्मार्क र एस्टोनियाले उठाएका आरोपहरूलाई रुसले अस्वीकार गरेको स्पष्ट पार्दै उनले यी घटनाहरूमा रुसको कुनै संलग्नता नभएको बताएका छन् ।

यसैबीच, उनले जोड दिए कि रुस कुनै देशविरुद्ध युद्ध खोजिरहेको छैन तर यदि आफ्नो सार्वभौमिकता वा सुरक्षामाथि आक्रमण भयो भने रुसले त्यसको जवाफ दृढतापूर्वक दिनेछ।