वाशिंगटन- अमेरिकी राष्ट्रपति डोनाल्ड ट्रम्पले टर्कीलाई रुससँग तेल किन्ने कार्य रोक्न आग्रह गरेका छन्। उनका अनुसार यसले युक्रेन युद्धमा मस्कोको युद्ध खर्च कटौती गर्न ठूलो सहयोग गर्नेछ।

ह्वाइट हाउसमा टर्कीका राष्ट्रपति रेसेप तैयप एर्दोगानसँगै आयोजित पत्रकार सम्मेलनमा ट्रम्पले भने, “रुसबाट तेल र ग्यास नकिन्नु नै उहाँले गर्न सक्ने सबैभन्दा राम्रो कदम हुनेछ।” उनले एर्दोगानलाई राष्ट्रपति भ्लादिमिर पुटिन र भोलोडिमिर जेलेन्स्की दुवैको नजिकका व्यक्तिका रूपमा उल्लेख गर्दै, चाहेमा उनले युद्धमा ठूलो प्रभाव पार्न सक्ने बताए।

बैठकमा अमेरिकाले टर्कीमाथि लगाइएका प्रतिबन्ध हटाउने वा लामो समयदेखि रोकिएको एफ ३५ लडाकु विमान खरिदबारे भने कुनै ठोस सहमति भएन। तर ट्रम्पले दुबै विषयमा सकारात्मक संकेत गरेका छन्। टर्कीलाई सन् २०१९ मा रुसको एस ४०० क्षेप्यास्त्र प्रणाली खरिद गरेपछि एफ ३५ कार्यक्रमबाट हटाइएको थियो।

टर्की, भारत र चीनसँगै, रुसको प्रमुख तेल र ग्यास खरिदकर्ता हो। यस वर्षको सुरुवातमा मात्र टर्कीमार्फत युरोप पुगेको रुसी ग्यासको मात्रा २६ प्रतिशतले बढेको तथ्यांक सार्वजनिक भएको छ।

संयुक्त राष्ट्रसंघ महासभामा यसअघि दिएको भाषणमा पनि ट्रम्पले नाटो सदस्य मुलुकहरूलाई रुसी ऊर्जा खरिद बन्द गर्न आग्रह गरेका थिए। उनले ऊर्जा खरिदलाई “आफैंविरुद्धको युद्धलाई वित्तीय सहयोग” भनेका थिए।

यसैबीच, अमेरिकी सांसदहरूले टर्कीलाई पुनः एफ ३५ कार्यक्रममा फर्काउने विषयमा आपत्ति जनाएका छन्। उनीहरूले टर्कीको सिरियामा सैन्य गतिविधि, ग्रीक हवाई क्षेत्रमा उल्लङ्घन र रुससँगको सहकार्यलाई चिन्ता व्यक्त गरेका छन्। तर ट्रम्पले प्रतिबन्ध चाँडै हट्न सक्ने र सहमतिहरू सम्भव हुने आशा व्यक्त गरेका छन्।

यो हप्ता मात्रै ट्रम्प र एर्दोगानबीच भएको यो दोस्रो भेट हो। यसअघि दुवैले संयुक्त राष्ट्र महासभाको क्रममा गाजाबारे छलफल गरेका थिए।