काठमाडौं : नेपाली कांग्रेसको तर्फबाट राज्य व्यवस्था समिति सभापति बनेका रामहरि खतिवडाले राजीनामा दिएपछि यतिबेला काँग्रेस नयाँ राज्य व्यवस्था समिति सभापति चयनको विषयलाई लिएर अलमलमा परेको छ।

पार्टी सभापति शेरबहादुर देउवाको बूढानिलकण्ठस्थित निवासमा हिजो बसेको शीर्ष नेताहरूको बैठकमा नयाँ सभापतिको नाममा छलफल भए पनि अन्तिम टुङ्गो भने लाग्न सकेको छैन।

राज्य व्यवस्था समितिको सभापतिको विषय टुङ्ग्याउनका लागि कांग्रेसले आज फेरि बैठकको आह्वान गरेको छ। यधपी, उपसभामुखलाई हटाउने विषयमा विभाजित देखिएको काँग्रेस र शेखर कोइराला पक्षधरका नेताहरुलाई आफ्नो कित्तामा समेट्न र आगामी निर्णयमा रुष्ट पक्षको समान सहभागिता र समर्थनको लागि देउवाले कोइराला पक्षबाट सभापति चयन गर्न सक्ने आंकलन गरिएको छ ।आज बस्ने भनिएको बैठकले रुपन्देही क्षेत्र नं ३ मा आगामी कात्तिकमा हुन लागेको उपनिर्वाचनबारे पनि छलफल गर्ने जनाएको छ।

त्यसैगरी,संसद सचिवालयले जारी गरेको कार्यतालिका अनुसार प्रतिनिधि सभाको राज्य व्यवस्था तथा सुशासन समिति सभापतिमा आज दिउँसो १ बजेदेखि ४ बजेसम्म मनोनयन दर्ता गर्न सकिने उल्लेख छ।कार्यतालिकामा सवा ४ बजे उम्मेदवारको सूची प्रकाशन गर्ने र बुधबार दिउँसो ३ बजे राज्य व्यवस्था तथा सुशासन समितिको सभाकक्षमा निर्वाचन गर्ने तालिका छ ।