काठमाडौं- नेपाली कांग्रेसले राज्यव्यवस्था तथा सुशासन समितिको सभापतिमा इश्वरी न्यौपानेलाई पठाउने निर्णय गरेको छ ।कांग्रेस सभापति शेरबहादुर देउवा निवासमा बसेकाे पदाधिकारी बैठकले न्यौपानेलाई राज्यव्यवस्था समिति सभापति बनाउने निर्णय गरेको हाे ।

निजामती विधेयकमा समावेश गरिएको कुलिङ पिरियड प्रकरणपछी सभापति रामहरि खतिवडाले राजीनामा दिएका कारण रिक्त रहेको उक्त पदमा न्यौपानेलाई पठाउने निर्णय भएको हो।

न्यौपाने संसदीय सुनुवाइ समितिको पनि सभापति रहेकोले सो समितिको सभापतिबाट उनलाई राजीनामा गर्न लगाएर राज्य व्यवस्था तथा सुशासन समितिको सभापतिको उम्मेदवार बनाउन लागिएको हो।

संसद सचिवालयले जारी गरेको कार्यतालिका अनुसार प्रतिनिधि सभाको राज्य व्यवस्था तथा सुशासन समिति सभापतिमा आज दिउँसो १ बजेदेखि ४ बजेसम्म मनोनयन दर्ता गर्न सकिने उल्लेख छ।कार्यतालिकामा सवा ४ बजे उम्मेदवारको सूची प्रकाशन गर्ने र बुधबार दिउँसो ३ बजे राज्य व्यवस्था तथा सुशासन समितिको सभाकक्षमा निर्वाचन गर्ने तालिका छ ।