पोखरा – बिहीबार रातिदेखि परेको अविरल वर्षाका कारण कास्कीमा एकै घरका ७सहित ११ जनाको मृत्यु भएको छ ।

पोखरा महानगरपालिका–१९ तल्लाकोटमा पहिरोले घरभित्रै पुरिएर एकै परिवारका ७ जनाको मृत्यु भएको छ भने पोखरा–३२ चैनपुरमा पहिरोमा पुरिएर तीन जनाको मृत्यु भएको छ ।

पोखरा–१९ पुरुनचौर तल्लाकोटमा घर माथिबाट आएको पहिरोले बिहीबार राति साढे १० बजेतिर माटो र टिनको छानासहितको एकतले घर भत्काएको छ । ४७ वर्षीय कुलबहादुर परियार, उनकी श्रीमती ४३ वर्षीया मानकुमारी, ८५ वर्षीया आमा लक्ष्मी, १५ वर्षीया छोरी प्रसन्ना, २० वर्षीया छोरी प्रभा, र ज्वाइँ २५ वर्षीय अस्मित परियार र आफन्त राधिका परियारको मृत्यु भएको कास्की प्रहरीले जनाएको छ । पहिरोमा पुरिएकालाई उद्धार गर्न जाँदा छिमेकी राधिका परियारको मृत्यु भएको थियो ।

पोखरा–३२ चैनपुरस्थित आरती ओझाको घर पहिरोले बगाउँदा १८ वर्षीया छोरी अनिता ओझा, ११ वर्षीया अनुष्का ओझा र ९ वर्षीय प्रतीक सुवेदीको मृत्यु भएको प्रहरीले जनाएको छ ।

यस्तै माडी गाउँपालिका वडा नम्बर ११ तल्लो सापलेमा पहिरोले पुरिएर ८० वर्षीया मैतीकुमारी गुरुङको मृत्यु भएको छ । ५५ वर्षीय छोरा ओमबहादुर गुरुङको सकुशल उद्धार गरिएको प्रहरीले जनाएको छ । मृतक सबैको शव पोष्टमार्टमका लागि पोखरा स्वास्थ्य विज्ञान प्रतिष्ठानमा राखिएको छ ।