बोगोटा- कोलम्बियाका राष्ट्रपति गुस्ताभो पेत्रोले गाजातर्फ गएको फ्लोटिलालाई इजरायली नौसेनाले रोकेपछि देशमा बाँकी रहेका सबै इजरायली कुटनीतिज्ञलाई देश निष्कासन गर्ने घोषणा गरेका छन्।

राष्ट्रपति पेत्रोको कार्यालयले नियन्त्रणमा लिइएका जहाजमा दुई जना कोलम्बियाली नागरिक रहेको पुष्टि गर्दै उनीहरूको तत्काल रिहाईको माग गरेको छ। पेत्रोले सामाजिक सञ्जाल ‘एक्स’ मा लेख्दै ती नागरिकहरू प्यालेस्टाइनप्रति एकजुट मानवीय गतिविधिमा संलग्न रहेको बताएका छन्। साथै उनले इजरायलसँगको स्वतन्त्र व्यापार सम्झौता पनि स्थगित गरिएको घोषणा गरेका छन् ।

गत महिना स्पेनबाट प्रस्थान गरेको फ्लोटिलामा ४० भन्दा बढी मुलुकका अभियन्ताहरू सहभागी थिए। तीमध्ये स्वीडिस जलवायु अभियन्ता ग्रेटा थनबर्गसहित दर्जनौंलाई इजरायलले बुधबार बेलुकी नियन्त्रणमा लिएका जहाजहरूसँगै पक्राउ गरेको हो।

इजरायली अधिकारीहरूले उक्त फ्लोटिलालाई उक्साहटपूर्ण कदम भन्दै यो मानवीय सहायता पुर्‍याउने उद्देश्य नभई हमासलाई सहयोग पुर्‍याउने प्रयास भएको दाबी गरेका छन्।

यस घटनापछि अन्तर्राष्ट्रिय स्तरमा इजरायलको कडा आलोचना भएको छ र विभिन्न देशहरूमा विरोध प्रदर्शनहरू भएका छन्।

यो कदम अमेरिकासँग पेत्रोको चर्को विवादपछि आएको हो। गत हप्ता संयुक्त राष्ट्रसंघ महासभामा न्यूयोर्कमा सहभागी हुँदा पेत्रोले अमेरिकी सैनिकलाई राष्ट्रपति डोनाल्ड ट्रम्पको आदेश पालना नगर्न आग्रह गरेका थिए। त्यसपछि अमेरिकाले उनको भिसा रद्द गरेको थियो।