काठमाडौं – अमेरिकाको विदेश मन्त्रालयले सार्वजनिक गरेको २०२४ को कन्ट्री रिपोर्ट्स अन ह्युमन राइट्स प्र्याक्टिसेस ले नेपालमा निरन्तर देखिएका मानवअधिकारसम्बन्धी समस्यामाथि गम्भीर चिन्ता व्यक्त गरेको छ। प्रतिवेदनमा जबर्जस्ती हत्या, यातना, प्रेस स्वतन्त्रतामा रोक, जबर्जस्ती श्रमजस्ता घटना र जवाफदेहितामा सरकार चुकेको औंल्याएको छ।

मंगलबार प्रकाशित प्रतिवेदनका अनुसार विगत वर्षको तुलनामा नेपालमा मानवअधिकारको अवस्थाको “महत्वपूर्ण परिवर्तन” नभए पनि मनमानी हत्या, अवैध थुनामा राख्ने, सञ्चारमाध्यममा रोक तथा मानव बेचबिखनजस्ता उल्लंघनहरू दर्ज गरिएका छन्। प्रतिवेदनअनुसार केही घटनामा छानबिन भए पनि दोषीलाई सजाय दिन सरकार असफल छ। श्रम ऐनको कार्यान्वयन निजी र अनौपचारिक क्षेत्रमा कमजोर छ, र महिलासहित अनौपचारिक श्रमिकलाई पर्याप्त सुरक्षा छैन।

द्वन्द्वकालीन न्याय, जेलभित्रको दुर्व्यवहार, पत्रकारमाथि आक्रमण, र वञ्चित समुदायमाथि प्रहरीको यातना अझै समस्या रहेको प्रतिवेदनमा भनिएको छ। संविधानले स्वतन्त्रता सुनिश्चित गरे पनि व्यापक कानुनी प्रावधानले विचार अभिव्यक्तिमा रोक लगाउने अवस्था कायम छ।

अन्ततः, अमेरिकी प्रतिवेदनले नेपालमा मानवअधिकारको अवस्था कमजोर रहेको र सुधारका प्रयासमा सरकार चुकेको निष्कर्ष निकालेको छ।